“Заман прозаһын инсценировкалау” лабораторияһының беренсе этабында биш проза авторы: Мөнир Ҡунафин, Таңсулпан Ғарипова, Игорь Савельев, Михаил Чванов, Ростислав Мырҙағолов һәм биш драматург: Марат Мөхлисов, Вадим Богданов, Екатерина Тимофеева, Владимир Жеребцов, Антон Бескоровайный ҡатнашҡан.
Проект етәкселәре Искәндәр Сакаев менән Ярослава Пулинович Санкт-Петербургтан махсус рәүештә саҡырып килтерелгән. Сарала ҡатнашыусыларға бер нисә йүнәлеш буйынса башҡорт ижадсыларының тормоштан алынған биш әҫәре тәҡдим ителгән.
“Проекттың төп маҡсаты – үҙебеҙҙең яҙыусы-ларыбыҙҙың әҫәрҙәрен төрлө жанрҙарҙа ҡулланыу”, – тип аңлатты проект авторҙарының береһе Зиннур Сөләймәнов. – Әйтәйек, проза әҫәрен драматургия жанрына күсереү, йәғни пьесаға әйләндереү. Драматургия – ул театр өсөн махсус яҙылған әҫәр. Пьесаны драматург үҙе яҙа, ә прозанан алынған әҫәр инсценировка тип атала. Уның үҙенең алымдары, тәртибе бар. Әйтәйек, ике битлек проза әҫәрен бер һөйләм менән генә аңлатырға өйрәнеү”.
Әҫәрҙәрҙе драматургия нигеҙенә һалырға өйрәнеү – был тәүге этап. “Заман прозаһын инсценировкалау” – ижади лабораторияның беренсе этабы шуның менән тамамланған. Ә икенсе этабы сентябрҙә старт аласаҡ.