Бөтә яңылыҡтар

Алты йәштә мөғжизә көтәбеҙ, ә туҡһан алтыла...

Һуңғы йылдарҙа Яңы йылға ҡарата кешеләрҙең ҡыҙыҡһыныуы кәмей, байрамса кәйеф аҙайҙы тиһәләр ҙә, быйыл ҡала урамдарында, хатта тамсытамып тороуға ҡарамаҫтан, кешеләрҙең күтәренке кәйефенә юлыҡтыҡ.

Кемдер магазинда салатҡа ҡыяр һайлай, кемдер баҙарҙа билмәнгә ит ала, бәғзеләр йорт алдын биҙәй, бала-саға тау шыуһа, ололар боҙ ҡаласыҡтары әҙерләй ине. Яңы йыл – ғаилә байрамы, шуға күптәр декабрь урталарынан уҡ йорттарына шыршы ултыртты. Михаил Дегтяревты ла беҙ шыршы алып ҡайтып килгән мәлендә тап иттек. Үҙе саҡ тиерлек атлаһа ла, ҡулына йәшел шыршы тотҡан, ә үҙе йылмайыуҙан балҡыған туҡһан алты йәштәге бабайға өндәшмәйенсә үтеп китә алманыҡ.
– Бала саҡта Яңы йыл байрамына шатланабыҙ, мөғжизәгә ышанабыҙ. Әммә тормошто аңлай башлағас, ул шатлыҡ менән мөғжизәне юғалтабыҙ һымаҡ. Тик был юғалтыу
үҙебеҙгә бәйле бит. Ниңә һуң тормоштан байрамса йәм тапмайбыҙ, ниңә кешеләр бер-береһен ҡыуандырып мөғжизә яһамай. Был шыршыны алып ҡайтып еткереп, биҙәп ҡуйһам, өйҙә шунда уҡ байрам мөхите тараласаҡ, күңел мөғжизә көтәсәк, – тип аҡһаҡал үҙ юлы менән китеп барҙы. Ә беҙ ябай ғына яуаптан килгән тәрән фәлсәфәнең мәғәнәһенә төшөнә алмай тора бирҙек. ысынлап та, ҡасан мөғжизәгә ышаныуҙан туҡтайбыҙ һуң, ҡасан туҡтаныҡ?..
Читайте нас в