ҺЫЛЫУ ҘА, ТЫРЫШ ТА, ҺӘЛӘТЛЕ ЛӘ БЕҘҘЕҢ ҠЫҘҘАР!

“Йыл ҡатын-ҡыҙ эшсеһе – 2024” һөнәри оҫталыҡ конкурсы үтте

Күптән түгел Стәрлетамаҡ ҡалаһында йыл һайын уҙғарылған “Йыл ҡатын-ҡыҙ эшсеһе – 2024” һөнәри оҫталыҡ конкурсының финалы үтте. Сода мәҙәниәт һарайы сәхнәһендә жюри ағзалары алдында ҡаланың төрлө предприятиелары һәм ойошмаларынан талантлы, эшһөйәр һәм ижади ҡыҙҙар сығыш яһаны. Сараны ҡала хакимиәтенең йәштәр сәйәсәте бүлеге, Башҡортостан профсоюз ойошмалары территориаль берләшмәһенең Стәрлетамаҡ ҡалаһы буйынса Координация советы һәм бренд-продюссер Вера Ротова ойошторҙо.

Һәләттәре йәрминкәлә үк сағылды

Конкурс сиктәрендә ҡыҙҙар үҙҙәре тураһында видеоформатта визитка әҙерләне һәм ижади номерҙа һөнәре, яратҡан шөғөлдәре тураһында һөйләне. Төрлө стилдәге бейеүҙәр, вокаль сығыштар, театрлаштырылған номерҙар булды. Бында ҡатнашыусыларға командалары, уҡыусылары, ғаиләләре әүҙем ярҙам итте.

Дәртләндереүсе һүҙҙәр менән Стәрлетамаҡ ҡала хакимиәте башлығының йәмәғәтселек менән бәйләнештәр буйынса урынбаҫары Павел Шорохов, Башҡортостан профсоюз ойошмаһы рәйесе Иршат Ниязғолов, йәштәр йәмәғәт палатаһы рәйесе – Зарина Ғәзизова сығыш яһаны. Сараның төп өлөшө башланыр алдынан ҡунаҡтар һәм жюри ағзалары партнерҙарҙың һәм ҡатнашыусыларҙың ҙур күргәҙмә-йәрминкәһен ҡарай алды. Артабан сәхнәлә конкурсанттар һәр береһе үҙҙәренең ижади сығышын күрһәтте.

Ҡыҙҙар бик матур һәм ҡыҙыҡлы сығыштары менән тамашасыларҙы хайран ҡалдырҙы. Артабан уларҙың сағыу бер нисәһенә туҡталып үтәйек.

“Завод исеменән сығыш яһауым менән ғорурланам!”

Стәрлетамаҡ нефть химияһы заводы исеменә конкурста пар менән тәьмин итеү һәм цех-ара коммуникациялар цехы мастеры Севара Кәримова сығыш яһаны. Севараның сығышында сағыу музыкаль номеры көслө алҡыштар менән оҙатылды. Тамашасылар һәм жюри ағзалары конкурсанттың үҙе яҙған йыр һүҙҙәренең шиғрилеген, уның вокаль һәләттәрен һәм харизмаһын билдәләне. Коллегаһына ярҙамға СНХЗ “Йәштәр советы” активистары килде, улар Севараға сығышты әҙерләүҙең бөтә этаптарында ла ярҙам итте. Шулай уҡ реклама һәм йәмәғәтселек менән бәйләнеш бүлеге, НефтеХим беренсел профсоюз ойошмаһы ярҙам күрһәтте.

“Конкурста завод исеменән сығыш яһауым менән ғорурланам, сөнки был ҙур яуаплылыҡ һәм юғары ышаныс. Мине яҡлаған һәм сығышымды ойоштороуҙа ярҙам иткән коллегаларыма, дуҫтарыма һәм ғаиләмә рәхмәт белдерәм. Был беҙҙең ҡаҙанышыбыҙ!” – тине “Харизма” һылыуҡайы Севара Кәримова.

Элина Ғәлиева Өфө дәүләт нефть техник университетында уҡыған дуҫтары менән көнсығыш бейеүен башҡарҙы. Тамашасыларҙы Элинаның нәфислеге, элегантлығы һәм үҙ ҡулдары менән теккән костюмдары һоҡландырҙы.

Стәрлетамаҡ троллейбус идаралығы исеменән Федорова Светлана сығыш яһаны һәм “Лидер образы” номинацияһында еңеү яуланы. Шулай  уҡ Светлананы профсоюз хәрәкәтен үҫтереүгә шәхси өлөш индергәне һәм хеҙмәтсән йәштәр араһында республика һөнәри оҫталыҡ конкурсының ҡала этабы финалында сағыу сығыш яһағаны өсөн “Автомобиль транспорты һәм юл хужалығы хеҙмәткәрҙәренең  Дөйөм Рәсәй профсоюзының Башҡортостан республика ойошмаһы”  йәмәғәт ойошмаһынан Почет грамотаһы менән бүләкләне.

Еңелеүселәр юҡ!

Финалға сығыусыларҙың барыһы ла спонсорҙар исеменән дипломдар, ҡиммәтле бүләктәр һәм сертификаттар менән бүләкләнде. Шулай уҡ һәр ҡатнашыусы тырышлығы һәм оҫталығы өсөн матур сәскәләр букеты алды.

Конкурста еңелеүселәр юҡ, һәр ҡатнашыусы еңеүсе, әлбиттә. Сөнки станок, руль, компьютер артында эшләгән был ҡыҙҙарҙың ҙур зал тулы кеше алдында сығып сығыш яһауҙары үҙе бер батырлыҡ бит  Ҡалала ошондай күләмдә конкурс үткәрелеүе бик яҡшы. Шулай итеп, еңе “Нур” шифаханаһы педиатры Динара Аҡтуғанова “Йыл ҡатын-ҡыҙ эшсеһе – 2024” конкурсының  еңеүсеһе һәм Гран-приға лайыҡлы булды! Ул артабанғы республика этабында Стәрлетамаҡ исеменән сығыш яһаясаҡ. Динараға уңыштар теләп ҡалабыҙ!

Конкурс һөҙөмтәләре буйынса урындар һәм номинациялар артабанғыса бүленде:

1-се урын – Мария Чурбаева,  “Ватан яугирҙәре ғаиләләре” комитеты.

2-се урын – Ульяна Гудкова, 29-сы мәктәптең рус теле һәм әҙәбиәте уҡытыусыһы.

3-сө урын – Светлана Тарасенко, “Сеймал компанияһы” акционерҙар йәмғиәтенең етештереү бюроһы инженеры.

- “Профсоюз ғорурлығы” һылыуҡайы – Анна Антипова, Стәрлетамаҡ төҙөлөш колледжы;

- “Грация” һылыуҡайы – Әлиә Иҙрисова, психоневрология интернаты;

- “Әүҙем ханым” һылыуҡайы – Айгөл Андреева, Стәрлетамаҡ йылылыҡ электр станцияһы;

- “Һөйкөмлө йылмайыу” һылыуҡайы – Элина Ғәлиева, “БСК” акционерҙар йәмғиәте;

- “Ышаныс” һылыуҡайы – Азалина Игизова, 87-се балалар баҡсаһы;

- “Стиль” һылыуҡайы – Лиана Абулханова, “Авангард” федераль акционерҙар йәмғиәте;

- “Элегантлыҡ! һылыуҡайы – Лиана Хәликәева, 1-се ҡала клиник дауаханаһы;

- “Ижади шәхес” һылыуҡайы – Юлия Бочкарева, “Водоканал!;

- “Илһам” һылыуҡайы – Ксения Полукарова, “Риком” компаниялар төркөмө яуаплылығы сикләнгән йәмғиәте;

- “Харизма” һылыуҡайы – Севара Кәримова, “СНХЗ” акционерҙар йәмғиәте;

- “Лидерлыҡ образы” һылыуҡайы – Светлана Федорова, Стәрлетамаҡ троллейбус идаралығы;

- “Камиллыҡ” һылыуҡайы – Екатерина Гаврилова, 19-сы балалар баҡсаһы;

- “Артистизм” һылыуҡайы – Анна Хәлиуллина, 15-се мәктәп.

Гүзәл РӘМИЕВА