ЙӨРӘГЕМ ҺӘР САҠ БАЛАЛАРҒА АШҠЫНДЫ!

Ҡаланың Ж.Кейекбаев исемендәге 3-сө гимназия ҡарамағындағы “Алтынай” балалар баҡсаһы тәрбиәсеһе Гүзәл Миңлебай ҡыҙы Рафиҡова нәҡ ошолай балаларҙы нисек бар, шулай ярата.
Гүзәл Миңлебай ҡыҙы балалар баҡсаһында ете йыл эшләй.  Әммә балалар баҡсаһына килгәнгә тиклем ул төрлө өлкәләрҙә үҙен һынап ҡараған. Заводта аппаратсы булып та эшләгән. Шулай ҙа балаларға кире ҡайтҡан.
- Үҙ урыныңдың, һәр минут һайын кәрәк булған ерҙә икәнен аңлағас, ҡалған бөтә нәмә лә мәғәнәһен юғалтҡан һымаҡ була. Мин оҙаҡ эҙләндем, үҙемде һынап ҡараным, әммә йөрәгем һаман да кире — балалар тауышына, уларҙың сикһеҙ “ни өсөн” тигән һорауҙарына, ышаныслы күҙҙәренә тартылды. Һәм бер көндө мин был саҡырыуға ҡаршы тороуҙан туҡтаным,- ти был хаҡта ул үҙе лә.
Ә был ышаныстың тамырҙары бала саҡҡа һәм ғаиләгә барып тоташа. Гүзәл Миңлебай ҡыҙының әсәһе Венера Юлдаш ҡыҙы ғүмер буйы Фёдоровка районында тәрбиәсе булып эшләгән. Ҡыҙы өсөн ул  кешеләргә ҡарата мөнәсәбәт өлгөһө булған. Ҡысҡырып әйтелгән һүҙҙәр менән дә түгел, ә көндәлек бәләкәй эштәр: түҙемлек, һәр кемгә иғтибар, бала әле әйтеп өлгөрмәгән нәмәне лә ишетә белеү. Һәм хәҙер ошо изге эштәр Гүзәл Миңлебай ҡыҙының төркөмөндә дауам итә.
- Әсәйем миңә бер ҡасан да: “Тәрбиәсе бул”, — тип әйтмәне. Ул был эш менән йәшәне. Мин уның янына ата-әсәләрҙең нисек килеүен, балаларҙың уға нисек һырылыуын, бер һүҙ менән генә лә ярһып илаған сабыйҙы тынысландыра алыуын күрҙем. Мин дә үҙ тәрбиәләнеүселәрем өсөн шундай уҡ терәк булғым килә», — тип бүлешә Гүзәл Миңлебай ҡыҙы.
  Бөгөн мәктәпкәсә йәштәге балалар менән эшләү — үҙе бер үҙенсәлекле хеҙмәт.
Гүзәл Миңлебай ҡыҙы йәшермәй: хәҙерге балалар икенсе төрлө. Улар гиперактив, етеҙерәк, тыныс ултыра алмайҙар. Ләкин уның тауышында ғәйепләү юҡ — киреһенсә, һөнәри ҡыҙыҡһыныу һәм яраҡлашырға әҙерлек һиҙелә.
- Улар менән бер урында тороп булмай. Етеҙерәк, уйлап табыусан булырға кәрәк. Шул уҡ ваҡытта — тынысыраҡ та, был тыныслыҡ уларға ла күсергә тейеш. Балаларҙың ташып торған энергияһын Гүзәл Миңлебай дөрөҫ йүнәлтергә ярҙам итә: уйынға, ижадҡа, изге эштәргә.
Гүзәл Миңлебай ҡыҙының төркөмөндә көндәлек тормошто йылытыусы үҙенең бәләкәй генә йолалары бар. Шуларҙың береһе — бер-береһен тыуған көндәре менән ҡотлау.
- Бала өсөн тыуған көн — ул “мин мөһим” тигәнде аңлата. Һәм мин төркөмдәге һәр баланың йылына бер тапҡыр булһа ла үҙен төп герой итеп тойғанын теләйем.Ошо мәлдәрҙә улар бер-береһенә ҡарап, икенсе кеше өсөн шатланырға өйрәнә. Был — изгелектең тәүге дәрестәре», — тип йылмая тәрбиәсе.
  Ғаиләһендә лә уңған хужабикә, һөйөклө әсәй, ҡатын. Тормош иптәше Фәнис Рафиҡов менән улар ике бала тәрбиәләп үҫтергәндәр. УлдарыРоберт әрме сафтарынан ҡайтҡан, ҡыҙҙары Әдилә университетта уҡый.
- Өйөмдә мин ябай әсәй һәм ҡатын. Әммә тәрбиәсе эше төп нәмәгә — сабырлыҡҡа һәм тыңлай белергә өйрәтәлер. Был өйҙә лә, эштә лә ярҙам итә,- ти ул.
- Ғаилә һәм эш — был бер үк мөхәббәттең ике яғы: кешеләргә, тормошҡа, үҙең башҡарған эшеңә булған мөхәббәт, — тип дауам итә һүҙен Гүзәл Миңлебай ҡыҙы.
Тәрбиәсе булыу — ул психолог та, артист та, түҙемле остаз да. Гүзәл Миңлебай ҡыҙы ошо ролдәрҙең барыһын да бер үк ваҡытта башҡара белә. Нәҡ уның кеүек балаларҙы яратҡан кеше генә тәрбиәсе була алалыр.