Ҡотҡоға бирелмәгеҙ!

Хәҙер иһә халыҡ-ара валюта фонды ла эпидемияның донъя иҡтисадына кире йоғонто яһаясағын таный. Һәр хәлдә, Ҡытай властары Хубэй провинцияһына инеү-сығыуҙы тыйғанға һәм эпидемияны “етди хәүеф” тип иғлан иткәнгә саҡлы донъя иҡтисадсылары был сирҙең йоғонтоһо сикле булыр тип уйлай ине.
Роспотребнадзорҙың төбәк буйынса идаралығы етәксеһе Александр Жеребцов хәбәр итеүенсә, республикала 300-ҙән ашыу кеше табиптарҙың күҙәтеүе аҫтында – улар күптән түгел генә сит илдән ҡайтҡан булған. Шулай ҙа тынысланырға иртә әле. коронавирус бар донъяға таралыуын дауам итә. Ошо нигеҙҙә Башҡортостан Башлығы радий Хәбиров кисә үҙенең фарманы менән меңдән ашыу кеше ҡатнашҡан йәки сит ил вәкилдәре ҡатнашлығындағы сараларҙы 20 апрелгә тиклем кисектереп торорға йәки бөтөнләй үткәрмәҫкә ҡушты. Шул уҡ ваҡытта ул хафаланмаҫҡа һәм ҡотҡоға бирелмәҫкә лә саҡырҙы. әйткәндәй, Башҡортостанда әлеге пандемияға ҡағылышлы махсус “ҡыҙыу линия” эшләй башланы. Уның һандары: +7 (347) 286 58 27. Сикләүҙәргә килгәндә, уҡыу йорттары өсөн дәрестәрҙе үткәрмәү йәки дистанцион рәүештә уҡытыуға күсеү буйынса ла тәҡдим булды. әммә әлегә бөтә мәктәптәр ҙә был йәһәттән ғәҙәти режимда эшләп килә. Был тема хаҡында ентекләберәк гәзиттең киләһе һандарында уҡығыҙ!