+11 °С
Ямғыр
Бөтә яңылыҡтар
Әҙәби күстәнәс
3 Февраль 2020, 19:40
ПАНОРАМА ЯҘАМ
Кәрим БУЛАТ.-Беҙҙең илдең тарих биттәре шанлы ваҡиғаларға бай. Илебеҙгә дошман ябырылғанда халыҡ Ватаныбыҙҙы яҡлап ҡалҡан булып күтәрелеп сыҡҡан - үҙ теләге, үҙ ҡоралы менән яуға сапҡан. Ата-бабаларыбыҙ Рәсәйҙең азатлығы өсөн яуға хатта үҙ аты менән киткән. “Панорама яҙам” тигән әҫәрем төрлө дәүерҙәрҙә, төрлө ваҡиғаларҙа ил азаматтарының күрһәткән батырлыҡтары тураһында.
(Ода)
Үҙ заттарым, ҙур Ватанлы булғас,
Үҙ ерендә күрмәй изгелек,
Дер һелкеткән тәхет хакимлығын
Яҙмыш мисәүенә егелеп...
Ватансылыҡ хисен иман иткәс,
Яу сабырға тағы көс кергән,
Рухлы халҡым, яуҙа теҙ сүкмәүсе,
Бөркөт йәнле улдар үҫтергән.
Ҡәрҙәштәрем менән үҙ заттарым
Ҙур Ватанын яҡлап яу сапҡан,
Еңеүселәр даны менән ҡайтҡан
Илбаҫарҙар яҡҡан усаҡтан.
Ҙур Ватандың көсөн күрмәҫ дошман
Күтәргәндә ҡабат ҡоралын.
Башҡорттарым Рәсәй ерен һаҡлай,
Һаҡлағандай үҙенең Уралын...
Панорама яҙам. Оло хеҙмәт.
Күп һыҙаттар кәрәк, аңлайым.
Унда ҡәрҙәштәрҙең батырлығын,
Шағирҙәрын килә данлайһым...
Бер рәсемгә яҙам башҡорт атын,
Евразия буйлап атлаған.
Үлем менән йәшәү көрәшендә
Кинйә тоҡомдарын һаҡлаған...
Алыҫ ҡырҡ өс. Башҡорт атлылары
Айҡап ҡайтҡас дошман тылдарын,
Шайморатов генералды маҡтап
Йырлай улар аҫыл йырҙарын...
“Ат уйнатып алдан бара
Шайморатов генерал”...
Генералым балҡып күкҡә ашҡас
Башҡорттарым аҙап ҡалмаған.
Дошмандарға иман уҡытырға
Күсимовтың беләге талмаған...
Шакирйәнем менән Миңлеғәли
Оло данға берҙәй атлаған.
Йән аямай дошман дзоттарын
Күкрәктәре менән ҡаплаған...
Панорама яҙам, Аллам ҡушты,
Һүрәтләнһен азат итеүсе,
Висла, Одер йылғаларын кисеп,
Европаға азатлыҡ илтеүсе,
Күп ҡорбандар биреп, Еңеү яулап,
Берлинғаса барып етеүсе!...
Еңеүселәр алып ҡайтҡан Еңеү -
Тарих йәшәй йырҙа, моңдарҙа.
Башҡорт атлылары ат эсергәс
Оло Иҙелдә, Неман, Дондарҙа...
Күктән ҡыуған дошман ҡоҙғондарын
Муса Гәрәевым “Ил”- ында.
Ул балҡытҡан алтын йодоҙҙарын
Йылы майҙа, Еңеү йылында...
Шул ҡырҡ биштә совет һалдаттары
Дошмандарға елле тондорған,
Ҡан-ҡәрҙәштәр - ғәййәр һуғышсылар
Фашизмдың билен һындырған...
Заһитовым дошман рейхстагына
Еңеү байрағын тәү мендергән.
Шул әләмде унда илткән юлда
Һалдат мәйеттәрен күп күргән...
Әсәйҙәргә фронт тылда булған,
Бил яҙҙырмай иген иккәндәр.
Һәр бөртөгөн һаҡлап саф алтындай
Еңеү ҡаҙнаһына илткәндәр.
Уның һәр бөртөгө дошмандарға
“Катюша”лар менән атылған.
Фронт ҡеүәт алған. Тылда аҙмы
Алабута еме татылған...
Панорама яҙам, иҫкә алам,
Ҡорбан булған аҫыл ирҙәрҙе.
Ал ҡандарын түгеп, һуғарыусы
Балтиҡ буйын, алыҫ ерҙәрҙе...
Панорамам алыҫ киләсәккә
Еңеүселәр данын еткерһен,
Рухташыма аманатым барһа,
Тыныслыҡты байраҡ итер тим...
Рухташтар булһа ҡәрҙәштәрем
Дошмандарҙан халҡым иҙелмәҫ.
Башҡорт иле – Рәсәйҙең биле,
Биле ныҡ булғанға еңелмәҫ!
Золомдарҙан ялҡҡан ата-бабам
Йомшаҡ күңел ҡай саҡ күрһәткән,
Ҡоҙғон күҙҙәр күңел асһын тиеп,
Дошманын да хатта үрләткән !..
Ҡәбәхәттәр, Бабич ҡанын ҡойған,
Башҡорттарҙы атҡан - киҫкәндәр...
Дошман заттар даны күтәрелгәс,
Изге йәндәр яфа сиккәндер?
Башҡорт илен тамуҡ иткән йәндәр
Шул заманда яза алмаған,
Ғәҙел тарих илдә яҙылмаған,
Иманһыҙлыҡ илде ялмаған.
Бер ҡаҡшағас рухи нигеҙебеҙ,
Тигеҙ урында ла һөрөндөк.
Иман тигән сыраҡ һүнеп ҡалғас,
Ғәмһеҙ йәшәргә лә өйрәндек.
Етер инде йәшәү ғәмһеҙләнеп,
Ғәҙеллекте талап итәйек!
Илдә ғәҙел тарих яҙған саҡта,
Зәки рухын ситкә типмәйек.
Яҡты рухтар мәңге хурланмаһын,
Тарих асһын ғәҙел күҙҙәрен.
Бабич рухы беҙҙе ҡарғамаһын,
Әмир рухы беҙгә рәнйемәһен,
“Оноттолар”,- тиеп, үҙҙәрен.
Аңһыҙ йәндәр булып йәшәмәйек,
“Мин – Себергә!”, - тиеп китмәйек.
Вәлиди, Бабич, Муса, Дауыт,
Мөхәмәтша рухтарын данлап,
Ғәҙел замандарға етәйек!
Кәрим БУЛАТ.
Читайте нас:
© 1990 - 2024 «Ашҡаҙар» гәзите.
Бөтә хоҡуҡтар ҙа яҡланған.
Мәҡәләләрҙе күсереп баҫҡанда, йә уларҙы өлөшләтә файҙаланғанда «Ашҡаҙар» гәзитенә һылтанма яһау мотлаҡ.
Зарегистрировано Федеральной службой по надзору в сфере связи, информационных технологий и массовых коммуникаций (РОСКОМНАДЗОР). Регистрационный номер: серия ПИ №ТУ02-01679 от 22 июля 2019 г.
Баш мөхәррир
Мансуров Рәмил Ғәбдрәшит улы.
Телефон
Баш мөхәррир (347) 325-18-57 Яуаплы сәркәтип (347) 325-18-57 Хәбәрселәр (347) 325-75-70 Бухгалтерия (347) 325-60-73
Электрон почта
Адресы
453124, РБ, г. Стерлитамак, ул. Комсомольская, 82
Реклама хеҙмәте
(347) 325-18-57
Редакция
(347) 325-18-57
Ҡабул итеү бүлмәһе
(347) 325-18-57
Хеҙмәттәшлек
(347) 325-18-57