-7 °С
Болотло
Бөтә яңылыҡтар
Әҙәби күстәнәс
7 Апрель 2020, 20:35
ЯҘ
Яҙ – ул яҙылмаған йырҙыңКөтөлгән бәрәкәте.Ярһыған Ер балаһыныңТыйнаҡлы хәрәкәте.
Яҙ – ул ғазаплы бәндәнең
Төҙәлгән йәрәхәте.
…Һәм күңелдең фанилыҡтан
Мәңгегә сәйәхәте.
ЯҘМЫШЫМДЫҢ ЯҘЫ
Өнөммө икән, әллә төшөммө икән –
Күгем тулы йәйғор нурҙары.
Яҙ бүләге булып улым тыуҙы,
Уға яҙам бишек йырҙарын.
«Тыныс йоҡла, көлөп уян», - тимен,
Аяҙ килһен иртә-таңдарың.
Гармундарҙа уйнай белмәһәм дә,
Һиңә булһын йөрәк моңдарым.
Ҡыуанысым, бар шатлығым һин бит,
Өлөшөмә төшкән көмөшөм.
Һин бит мажаралы яҙмышымдың
Көтөлмәгән яҙғы емеше.
Яҙмышымдың яҙы килде миңә,
Ҡәҙерлерәк бөтә яҙҙарҙан.
Аҡ биләүҙә ятҡан ғәзиз балам
Наҙлыраҡ бит бөтә наҙҙарҙан.
БАЛАН
Мин яуапһыҙ мөхәббәтте
Баландай тирер инем,
Үҙемде лә, һине лә бит
Бәхеткә төрөр инем.
Ҡыш булып килһәң, яныңда
Аҡ ҡарҙай ирер инем,
Яҙ булһаң, ләйсән аҫтында
Сыланып йөрөр инем.
Йәй Сулпан булып атылһаң –
Айың мин булыр инем.
Көҙгө тирәк янындағы
Ҡайының булыр инем.
Эх! Йәшлегем ярһыуҙары –
Бөтәһе лә ҡабалан…
Ә һөйөүем ғазаптары –
Иртә өҙөлгән балан!
МИҺЫРБАНЛЫҠ
Балаҫты ла ҡаҡмағанмын –
Ҡарҙары бөтөп бара.
Ҡыштар үтте, үтмәне тик
Йөрәктә ҡалған яра.
Шул яраны төҙәлтер бит
Яҙҙағы миһырбанлыҡ.
Мине ҡотҡарһа ҡотҡарыр
Эргәмдә һинең барлыҡ.
Күңел тарлығың күпмегә?
Белһәм, иретер инем,
Ғүмерҙе ҡайтарып булһа,
Һине ир итер инем.
ҮЛГЕ КИЛМӘЙ
Ҡараңғы төн, шундай ҡараңғы төн…
Сәйер ямғырҙар һәм йәйғорҙар.
Ни үлге, ни йәшәге килмәгән миҙгел.
Дамир Шәрәфетдинов
Йәйғор көтөп үтә ғүмерҙәрем –
Сәйер ямғырҙарға ҡойонам.
Ҡараңғы төн, шундай ҡараңғы төн:
Төндөң ҡуйынына һыйынам.
Үлге килмәй, йәшәге лә килмәй
Һинһеҙ ҡабатланған миҙгелдә,
Офоҡтағы шәфәҡ нурҙарында
Ҡояш байыуҙары һиҙелә.
Аҡылымды эшкә егер мәлем,
Ижад – тәбиғәттең сереме?
Ямғырҙарҙан йәйғор һуҙыуҙарым,
Мөхәббәтем – йөрәк сиреме?
…Үлге килмәй, йәшәге лә килмәй –
Яңғыҙ төнөм шундай ҡараңғы…
Әллә һинһеҙ үткән миҙгелдәрем
Ҡабат яҙға табан барамы?
Римма ҒӘЛИМОВА
Новости партнеров