+30 °С
Болотло
Әҙәби күстәнәс
8 Декабрь 2020, 12:40
Күктәргә күтәрҙе мине Башҡортостаным!
АУЫЛЫМА Ҡайтам тим дә ҡайталмайса ҡалам, Бәндәне бит яҙмыш йөрөтә. Тыуған ерҙән ситтә йәшәгәнде Һағыш-һағыныуҙан йән өтә.
Йәш саҡтағы тәүге мөхәббәт тип
Егеттәр юҡ беҙҙе илатҡан.
Ауылдаштар араһынан кемдәр
Ғәзиз яҡындарын юғалтҡан?
Баҫыу ҡапҡаһына етеү менән
Күҙҙәремде минең йәш өтә.
Ошо ҡапҡаларҙан яуға киткән,
Сит тарафта ризыҡтары бөткән
Яугирҙәрҙең рухы йәшәтә…
Эй, ауылым, ҡайталмаған саҡта
Төштәрҙә лә йөрәк яралы.
Ғүмер булһа, әллә күпме тағы
Ҡайтыр саҡтарым да бар әле!
БАШҠОРТОСТАН
Осона сыға алмайым
Йөрәк хисенең…
Киләсәккә ҡалырмы һуң
Минең исемем?
Тыуған телен онотмаһа
Башҡорт балаһы.
Яҙған китаптар уҡылыр,
Булыр дауамы.
Ҡурай моңдары дәрт өҫтәр
Бишек көйөнә…
Ошо илдә тыуғанына
Һәр кем һөйөнә.
Сөнки беҙҙең Ватаныбыҙ
Меңгә берәү ул.
Башҡортостан илебеҙгә
Көслө терәү ул.
Гөл-баҡсалай ошо илдә
Йәшәйбеҙ күптән,
Тыуған яҡтың тартыу көсө,
Һауаһы бүтән!
Һауа ярып иламаным,
Булды осҡаным…
Күктәргә күтәрҙе мине
Башҡортостаным!
ҠАПМА-ҠАРШЫЛЫҠ
Тыңлаусың булғанда ғына
Шиғыр яҙыла.
Ҡарҙар иреп бөтмәйенсә
Килмәй яҙы ла.
Күңел яҙының йырҙарға
Сарсыған сағы.
Йөрәктең дә мөхәббәтһеҙ
Ярһыған сағы.
Сабырлыҡ менән яҙҙарҙы
Ғашиҡ иттерҙем.
Һуңлап килгән мөхәббәтем
Оҙаҡ көттөрҙең.
Дөпөлдәп аңлай йөрәгем
Өшөгәнемде…
Үҙем беләм: һинһеҙ нисек
Йәшәғәнемде.
Йәшерһәк – йәшермәһәк тә
Бар ул мөхәббәт,
Ғашиҡ иттерҙең һин мине
Үҙеңә ҡабат!
Һинең менән йәшәүҙәре
Күңелһеҙ миңә.
Йөрәк яңғыҙлыҡты көҫәй -
Тик һинһеҙ генә!
Үҙеңде үҙең аңлауы
Ҡыйын был йәштә,
Офоҡтар артына ҡаса
Хатта ҡояш та.
Ҡояштан йылы аламын
Ул мине аңлай.
«Ғүмерең үтеп бара» тип
Йөрәк һулҡылдай…
ҠОТОЛОУ ЮҠ
Рәнйеткәнем булды һеҙҙе минең
Ҡырыҫ холҡом менән ир-егеттәр.
Асыу килә: урам тулы хәҙер
Берәҙәк ирҙәр. берәҙәк эттәр…
Концерт килһә. залдар тула бары
Төркөм-төркөм яңғыҙ ҡатын менән,
Улар һымаҡ ҡыҫыр төндәремдә
Күктең ете ҡаттарына менәм.
Эй, ғүмерҙәр, үтеп бара инде
Сикһеҙ төндәр менән таңдар ата,
Ауылдарҙа ирҙәр эсеп ята.
Ҡалаларҙа күпме ҡатын-ҡыҙҙың
Яңғыҙлыҡтан әрнеп эсе яна.
Был хәлдәргә сыҙап кем оталыр?
Кәрт уйыны һымаҡ отолоу юҡ.
Сәсте йолҡоп үкһеп илаһаҡ та
Ошо михнәттәрҙән ҡотолоу юҡ.
