+24 °С
Болотло
Башҡорт теле йылы
8 Декабрь 2020, 11:55
Эй, гүзәл зат, һинең күңелең нескә, уйың бай зирәклеккә!
Башҡортостандың сәнғәтен, мәҙәниәтен, әҙәбиәтен башҡорт ҡатын-ҡыҙҙары шиғриәтенән башҡа күҙ алдына килтереп булмай. Баҫҡан тупрағының йылыһын, эскән һыуҙарының тәмен, һулаған һауаларының хуш еҫен шағирәләр, үҙ йөрәгенә йыйып, ҡоштар итеп осора, тыуған халҡына байрам бүләк итә. Улар ижадында ҡатын-ҡыҙға ғына хас нескәлек ята. Күптән түгел Ҡала мәҙәниәт һарайында башҡорт шиғриәтен һөйөүсе ҡатын-ҡыҙҙарҙың тәүге осрашыуы уҙҙы. Ошо илаһи осрашыуҙа йәнә бер тапҡыр әлеге нескәлеккә, зирәклеккә тап булдыҡ.
Ҡала мәҙәниәт һарайы методистары Рәмилә Ғаяз ҡыҙы Нәзирова һәм Хәлиҙә Файзрахман ҡыҙы Абдрахманова башланғысында ойошторолған клубтың тәүге кисәһендә ҡалабыҙҙың төрлө даирәләрендә эшләүсе ҡатын-ҡыҙҙар саҡырылғайны. Сәсмәүерҙәр оҫтаһы, “Йәш ғаилә – 2020”, “Етегән – 2020” конкурстарында ҡатнашыусы Гөлсөм Урал ҡыҙы Ишмөхәмәтова, мәҙәниәт колледжынан китапханасы Гүзәл Йәмил ҡыҙы Шәмиғолова, Ж. Кейекбаев исемендәге 3-сө башҡорт гимназияһының башланғыс кластар уҡытыусыһы Зифа Ғәббәс ҡыҙы Бикбаева яратҡан авторҙарының шиғырҙарын тасуири итеп уҡып ишеттерҙе. Дилә Булғаҡова, ошо юлдар авторы менән бер рәттән, шулай уҡ ир-азатаматтар, мәшһүр шағирҙарыбыҙ Дауыт Юлтый, Рәми Ғарипов, Мостай Кәрим яҙған нәфис һүҙҙәр төрлөсә яңғыраны.
Ошо ябай ғына кисә аша кешеләрҙе уйландырыусы, моңландырыусы, рухты ҡанатландырыусы, тыуған Башҡортостаныбыҙ ауазын алыҫ илдәргә һәм тыуыр йылдарға еткереүсе, таштарҙа ла гөлдәр үҫтереүсе мәңгелек башҡорт шиғриәтен һөйөүсе башҡорт ҡатын-ҡыҙҙарының тауыштары яңғыраны һәм тарихта ҡалды, шиғриәтте үҫтереүҙә саҡ ҡына булһа ла үҙ өлөшөн индерҙе. Сараны техник һәм музыкаль йәһәттән ҡалабыҙҙың танылған композиторы Марат Зәйнетдинов биҙәне.
...Студент саҡтарымдан алып һәм бөгөн дә мин халҡым яҙмышына битараф түгелмен, ул бәхетһеҙлек кисергәндә, күңелем бөтөн була алмай, әммә шул уҡ ваҡытта бәләкәй генә әйберҙән дә бәхет сатҡылары табып ҡыуанырға өйрәндем, сөнки мин – ҡатын-ҡыҙ, үҙем – бәхет сығанағы. Ил ҡайғыһын иңемә һалып, гелән бойоҡ сырай менән йөрөһәм, балаларым ниндәй фиғелдә булырға тейеш?! Яҡындарыма ҡарап ихлас күңелдән йылмайырға сәбәп табам икән, тимәк, мин – бәхетле! Мин – ҡатын-ҡыҙ!.. Кисәнән һуң күңелгә ошондай хистәр ояланы. Әлегеләй кисәләр ҡалабыҙҙа артабан да һүрелмәһен ине, гүзәл заттар шиғриәте, ир-азаматтар ижады яңғырап торған клубтар, ҡорҙар йәшәһен ине!
