Тәтешле — гәрәй, ирәкте, танып башҡорттары төбәге

Шулай уҡ һәр район өсөн айырым баҫма донъя күрҙе. Унда шул төбәктәрҙә йәшәгән башҡорттар тарихы, мәҙәниәте һәм йолалары менән танышырға мөмкин. Республика Стратегик тикшеренеүҙәр үҙәгенең Социологик-мәҙәни бүлеге хеҙмәткәрҙәре быйыл төньяҡ-көнбайыш район халҡын ошо әсбаптар менән таныштырыу саралары уҙғара. 4 декабрь башҡорттарҙың Гәрәй, Ирәкте, Танып ырыуҙары биләмәһендә урынлашҡан Тәтешле районы халҡы өсөн презентация ойошторолдо.

Онлайн-семинарҙа район башлығы Фәнүр Шәйхисламов, республика Стратегик тикшеренеүҙәр институтының Социологик-мәҙәни үҙәге етәксеһе, тарих фәндәре кандидаты Юлдаш Йосопов, «Шәжәрә» Башҡортостандың тарихи мираҫын өйрәнеү үҙәге" коммерцияға ҡарамаған автономиялы ойошмаһы етәксеһе, тарих фәндәре кандидаты Салауат Хәмиҙуллин, философия фәндәре кандидаты Рәфил Аҫылғужин һәм башҡалар ҡатнашты.

Сарала «Башҡорт ырыуҙары һәм ауылдары картаһы», «Төньяҡ-көнбайыш Башҡортостандың башҡорт ырыуҙары һәм ауылдары картаһы» менән таныштырҙылар. Уларҙа тарихи документтар һәм картография материалдары ярҙамында мөһим мәғлүмәттәр бирелгән. Был методик пособиелар тарих-архив документтарын өйрәнгәндә кәрәк. Шулай итеп, хәҙер уларҙың береһе тәтешлеләрҙең дә тарихи мәғлүмәттәргә бай төйәгенә арналды. Тулыраҡ танышыу өсөн һылтанма: http://bashkortlar.ru/tatyshly

Тәтешле районында 22800 кеше йәшәй, шуның 61,8 проценты — башҡорттар, удмурттар — 21,5, татарҙар — 14,5 процент, урыҫтар — 1,8, башҡа милләттәр — 0,3 процент. Был төбәк Ғәли Соҡорой, Ғарифулла Кейеков, Әнғәм Атнабаев, Хәниә Фәрхи, Салауат Фәтхетдинов кеүек шәхестәрҙең тыуған төйәге.

Төньяҡ-көнбайыш башҡорттарының үҙ сығышы менән ҡыҙыҡһыныуы, ата-бабаларының шәхестәрен асыҡларға теләүе тәбиғи күренеш. Был йәһәттән фәнни-методик белешмә тарихи үткәндәрҙе асыҡлауға мөһим башланғыс булып тора.

https://kurultai.ru