+18 °С
Облачно
Белмәй ҡалмағыҙ
10 Апреля 2020, 09:30
«Һыраны урынына ҡуйығыҙ, һатылмай!»
Эштән ҡайтышлай икмәк алырға кибеткә инһәм, һатыусы бер иргә: «һыраны урынына ҡуйығыҙ, һатылмай!» -тине. Өйөнә ҡайтҡас һыра эсеп, һуңғы ваҡыттағы коронавируска бәйле хәлдәрҙән «душа»һын бушатҡыһы килдеме икән уның? Һәр хәлдә йәмәғәт именлеген тәьмин итеү маҡсатында Башҡортостан Башлығы Радий Хәбиров республика биләмәһендә алкоголле продукцияны берәмләп һатыуҙы өҫтәмә сикләү тураһындағы Указға ҡул ҡуйыуын ишетмәгән булған инде ул...
Ошо Указға ярашлы, 1 апрелдән башлап «Юғары әҙерлек» тәртибе ғәмәлдән сығарылғанға тиклем төбәктә урындағы ваҡыт буйынса киске сәғәт 6-нан иртәнге 10-ға тиклем алкоголде һатыу ( шул иҫәптән йәмәғәт туҡланыуы хеҙмәте күрһәткәндә лә) тыйыла.
Ошоға бәйле Республика Башлығы Хакимиәтенә Башҡортостан Дәүләт Йыйылышы – Ҡоролтайға тәҡдим итеү өсөн «Башҡортостан Республикаһында этил спирты, алкоголле һәм спиртлы продукция ҡулланыуҙы (эсеүҙе) сикләү тураһында»ғы Башҡортостан Республикаһы Законына үҙгәрештәр индереү хаҡында»ғы закон проектын әҙерләү бурысы йөкмәтелгәйне. Парламент уны ҡарарға һәм 13 апрелгә тиклем ҡабул итергә тейеш. Шул рәүешле алкоголь һатыу беҙҙә сикләнә. Аҙна һайын байрам итергә күнеккәндәргә бер аҙ тыйылып торорға тура килә инде.
Римма ҒӘЛИМОВА.