+2 °С
Болотло
Бөтә яңылыҡтар
10
Общие статьи
2 Ноябрь 2018, 18:31
Ҡаҙ тәпәйенән аштар
Ҡаҙҙың тәпәйен ҡырҡып, эҫе һыу менән бешекләйбеҙ йәки өтәбеҙ, шунан тиреһен һыҙырып, тырнағын алып ташлайбыҙ, яҡшылап йыуабыҙ. Ҡаҙҙың эсәген айырып, эсендәге бысрағын һығып сығарабыҙ, буйынан-буйына ярабыҙ ҙа һәйбәтләп таҙартабыҙ. Тоҙ менән ышҡып, тағы яҡшылап йыуабыҙ. Шунан эсәкте тәпәйгә урайбыҙ, тағатылып тормаһын өсөн осон беркетеп нығытабыҙ.
Ошолай әҙерләнгән тәпәйҙе ҡаҙ-ҙың эс-бауыры йәки ит менән бергә бешерәбеҙ. Ашҡа картуф, кишер, туҡ-мас, һуған төшөрәбеҙ. Дөгө ярмаһы йә йәшелсәләр менән бешерһәң дә була. Эсәк уралған ҡаҙҙың тәпәйе менән картуф һалып бәлеш бешерһәң дә телде йоторлоҡ була. Ҡаҙ тәпәйенән дерелдәк тә эшләйҙәр. Иң тәүҙә тәпәйҙәрҙең тышын һыҙырып, өтөп-таҙартып йыуғас, һалҡын һыуға һалабыҙ. Яй ғына утта ҡайнатабыҙ, самалап тоҙ өҫтәйбеҙ. Йәшелсә тәме бирергә теләһәң, кишер, һуған ҡушырға мөмкин. Ике сәғәт самаһы ваҡыт бешеп, ит һөйәгенән айырылғас, уттан алабыҙ. Һурпаһын һөҙәбеҙ, итен турағыстан үткәрәбеҙ. Шунан уларҙы бергә ҡушып болғатабыҙ ҙа (ҡара борос һалып ебәрергә һәм башҡа тәмләткестәр өҫтәргә мөмкин) һауыттарға һалып сығабыҙ, һыуытырға ҡуябыҙ. 6-8 сәғәттән дерелдәк әҙер була.
Р. САФИНА.
Читайте нас:
