«Тын алыусы» памперстар әкиәтенә һаман ышанаһығыҙмы?

Ғалимдар памперстар ҡулланыу демографияға кире йоғонто яһай, тиһәләр ҙә замана ата-әсәләре бала ҡарауҙа ярҙам итеүсе памперстарға ныҡлап һалышып алды. Кейҙерәһең дә, ваҡыты еткәс, ташлайһың да ул, ә бына һаулыҡҡа зыян итмәй микән? Тикшереү һөҙөмтәләре буйынса арзан һәм ҡиммәтле памперстар ҙа хәүефһеҙ тигән һығымта яһалған. Шулай ҙа сифат билдәһен 5 сауҙа маркаһы ғына ала алған.

Памперстарҙың төп маҡсаты – һыуҙы үҙенә һеңдереп, оҙағыраҡ ваҡыт уны тота алыу. “Роскачество” талаптары буйынса, памперс 270 грамдан да аҙыраҡ булмаған шыйыҡсаны һеңдерә алырға тейеш. Был тикшереүҙе памперстарҙың ике төрө генә үтә алмаған, ә шулай ҙа ГОСТ талаптарына барыһы ла тура килгән, уның буйынса 3 секунд эсендә 80 сантиметр куб күләмендәге шыйыҡса һеңергә тейеш.

Әйткәндәй, тестар араһында тағы ла бер ҡыҙыҡлыһы бар: һеңдерелгән шыйыҡсаны кире сығармау, йәғни 240 грамм шыйыҡса-нан 6 грамдан артығы кире ағып сығырға тейеш түгел. Бындай талапты тик 13 марка аҫтында сығарылған тауар үтә алған, араларында 1 грамм да бүлеп сығармаған лидерҙар ҙа бар. Ғәҙәттә, ата-әсәләр бындай һандар тураһында ҡыҙыҡһынмай, ә ҡаптың тышына ҙур хәрефтәр менән яҙылған «тын алыусы» памперстарға ышанысын белдерә. Тик бына “Роскачество” ундайҙарҙың бөтөнләй булмауын иҫбатлай. Яуабы ла уның ябай: һауа үткәргән памперс нисек һыуҙы тоторға тейеш һуң?

Э. МӨНИРОВ.