Төҙөүселәр урамында йәйәүлеләр зонаһы кәрәк

2018 – 2022 йылдарҙа тормошҡа ашырыласаҡ проекттың маҡсаты, әйтелгәнсә, ҡалаларҙы үҫтереүгә, уларҙа халыҡ өсөн уңайлы шарттар, ял урындары булдырыуға ҡайтып ҡала. Шуныһы һөйөнөслө: бындай ярҙамға ниндәй биләмәләр мохтаж, ҡайҙа ремонт, үҙгәреш талап ителгәнен граждандар үҙҙәре хәл итә. Объекттар уларҙың тауыш биреүе һөҙөмтәһенә ярашлы һайлана. Билдәле, өҫтөнлөк алған проект планға индерелә. Субсидияның өстән ике өлөшө – мотлаҡ күп ҡатлы йорттар ихатаһын төҙөкләндереү, ә ҡалғаны халыҡ күпләп йөрөгән урындарҙы (мәҫәлән, скверҙар, майҙансыҡтар, яр буйҙары) яңыртыуға бүленә.

Нисек һайларға һуң теләгән объектыңды? Был йәһәттән мәғлүмәтте ҡала хакимиәттәренең рәсми сайттарынан табырға була. Ҡыҙыҡһындырған урынды тапҡас, халыҡ күмәкләп проектҡа бәйле үҙ фекерен белдерә, кәңәшләшә ала.

– Стәрлетамаҡтар 9 ғинуарҙан алып 9 февралгә тиклем 22 проект буйынса тауыш бирҙе. Һайланғандар араһында балалар майҙансығы, парктар, Стәрле, Ольховка йылға¬ларының яр буйҙары бар, – тип белдерҙе, мәҫәлән, ҡала хакимиәте башлығы урынбаҫары Андрей Ермолаев “Заманса ҡала мөхитен булдырыу” маҡсатлы программаһын тормошҡа ашырыу буйынса йәмәғәт комиссияһы ултырышында. – Шулай ҙа халыҡ иң күп тауышты Төҙөүселәр урамында (Октябрь проспектынан Ҡаранай Моратов урамына тиклем) йәйәүлеләр зонаһы өсөн бирҙе – 1612 тауыш. Тимәк, Стәрлетамаҡта ғаилә менән ял итеү урындарын күберәк булдырырға кәрәк, – тигән асыҡлыҡ та индерҙе ул. Йәмғеһе 8 549 кеше тауыш биргән, уларҙың араһында мәктәп уҡыусылары булыуы ла ҡыуандыра – киләсәк ышаныслы ҡулдарҙа. Артабан Андрей Петрович комиссия ағзаларын ҡайһы бер хаттарҙың эстәлеге менән таныштырҙы. Иң мөһиме: комиссия тауыш йыйыу эштәрен берҙәм хупланы.

Әйткәндәй, былтыр нәҡ ошо программаға ярашлы ҡаланың Хо-ҙайбирҙин урамындағы йәйәүлеләр зонаһы төҙөкләндерелде. Шулай уҡ 90-дан ашыу йорт алды күркәм төҫ алды, велосипедта елдерергә яратҡандарға айырым ял урыны булдырылды, юлдарға асфальт түшәлде, ҡороған ағастар урынына йәш үҫентеләр ултыртылды, ҡоймалар яңыртылды, яңы туҡталҡалар барлыҡҡа килде.

Андрей Ермолаев билдәләүенсә, ҡаланы киләсәктә лә ошондай прог-раммалар ярҙамында матурлау мөм-кинлеге киң файҙаланыласаҡ.