УҪЫЛЫ – БЕРҘӘМ ҒАИЛӘ

"Рәсәй халыҡтарының берҙәмлеге йылы" һәм "Айыҡ ауыл-2026" республика конкурсы сиктәрендә бында "Уҫылы- берҙәм ғаилә" асыҡ спорт фестивале үтте. Был сара Стәрлетамаҡ районында йәшәүселәрҙең генә түгел, республиканың башҡа төбәктәренән килгән ҡунаҡтарҙы ла йыйҙы.
Сарала Стәрлетамаҡ районы хакимиәте башлығы урынбаҫары, Афғанстандағы хәрби хәрәкәттәрҙә  һәм махсус хәрби операцияла ҡатнашыусы Салауат Миңнислам улы Фәритов, хакимиәт башлығы урынбаҫары Эльвера Ғүмәр ҡыҙы Иманғолова, махсус хәрби операцияла ҡатнашыусы, хәрби округ ветерандары ассоциацияһы рәйесе, отставкалағы подполковник Фәрит Абдрахман улы Миһранов, шулай уҡ Стәрлетамаҡ районының почётлы гражданы, РФ атҡаҙанған физик культура хеҙмәткәре, Стәрлетамаҡ ҡалаһының физик культура, идара итеү һәм сервис колледжы директоры Миҙхәт Биктимер улы Мусаҡаев ҡатнашты.
   Сарала ҡатнашыусылар спорт ярыштарына ҙур энтузиазм менән ҡушылды: кемдер саңғы трассаларын яулаһа, икенселәре милли көрәштә етеҙлеген күрһәтте. Бер үк ваҡытта шашка уйындары ла ҙур ҡыҙыҡһыныу тыуҙырҙы, унда теләгән һәр кем үҙ эшенең ысын оҫтаһы - донъя һәм Европа чемпионы, халыҡ-ара гроссмейстер Муродулло Амриллаев менән көрәшә алды. Чемпион менән уйнарға теләүселәр бик күп булды, хатта ҙур сират теҙелде. Әйткәндәй, чемпион был көндә йөҙ кеше менән шашка уйнаны.
- Гроссмейстер бер юлы йөҙләгән кеше менән уйнаған бындай турнир беҙҙең районда беренсе тапҡыр үткәрелә! Барыһы ла ҙур ҡәнәғәтлек ала, һәм һәр ҡатнашыусы өсөн был оло хөрмәт! - тип билдәләне физик культура, идара итеү һәм сервис колледжы директоры Миҙхәт Мусаҡаев.
 Спортсылар ярышҡансы, ҡунаҡтар райондың үҙешмәкәр артистарының сығыштарын ҡараны, улар үҙҙәренең дәртле йырҙары менән барыһын да шатландырҙы. Ә Милли мәҙәниәттәр үҙәге үҙенсәлекле тирмәләр ҡуйҙы, унда һәр кем Стәрлетамаҡ районында йәшәүсе халыҡтың мәҙәниәт, көнкүреш һәм үҙенсәлекле кәсептәре донъяһына сума алды.
Ошо күркәм байрамда махсус   хәрби операция  ветерандары ла ҡатнашты, уларҙың килеүе айырым хөрмәт һәм ғорурлыҡ хисе уятты. Ауыр һынауҙар аша үткән был кешеләрҙең, сәләмәт йәшәү рәүешен пропагандалап һәм үҙҙәренең өлгөһөндә йәш быуынды илһамландырып, йәмғиәт тормошонда әүҙем ҡатнашыуы барыһын да һоҡландырҙы.
Спорт фестивале Стәрлетамаҡ районы һәм республикаһы халҡы өсөн Айыҡлыҡ һәм Спорт цитатаһын ябай  ғына һүҙҙәр түгел,ә  девиз булып яңғырауын күрһәтте.
- Был фестивалде ысын мәғәнәһендә ҡышҡы һабантуй тип әйтергә лә мөмкин,- тип тәъҫораттары менән бүлеште Николаевка ауылынан килгән ҡатнашыусы Елена Зубкова. Ә Стәрлетамаҡ районының Наумовка ауылы  мәктәбе уҡытыусыһы  Марина Звягинцева  саңғы ярыштарында ҡатнашҡан.
-  Бөгөнгө фестиваль  үҙен спортҡа профессиональ бағышлағандар өсөн генә түгел, әүҙем йәшәү рәүешен алып барғандар өсөн ҙур байрам. Хәрәкәт - ул энергия, һаулыҡ, яңы тәьҫораттар. Ә кемдәр иң әүҙем, шат күңелле һәм һәр саҡ йүгерергә, һикерергә, уйнарға әҙер? Әлбиттә, был беҙҙең балаларыбыҙ! Улар өсөн икеләтә ҡыуаныслы булды, һәр береһе ҡулына диплом, бүләктәр тотоп ҡайта,- тип ҡыуанысы менән уртаҡлашты Марина Васильевна.
Ә бына Стәрлетамаҡ ҡалаһының «Күбәләк» педагогика, психология һәм социаль үҫеш академияһы» автономлы коммерцияға ҡарамаған ойошмаһынан сит ил студенттары бөтә төр ярыштарҙа ла ҡатнашты. Был ойошма  Өфө фән һәм технологиялар университетының Стәрлетамаҡ филиалы педагогика һәм психология факультетында урынлашҡан.
 - Яңы мәғәнәләр, технологиялар һәм алымдар берләшкән осорҙа академия социаль һәм мәҙәни проекттарҙа әүҙем ҡатнашыу һәм үҙ-үҙеңде күрһәтеү өсөн майҙансыҡ бирә. Беҙҙең миссия - фән һәм мәғариф, психология һәм педагогика, төрлө категориялы кешеләргә социаль ярҙам өлкәһендә инновацияларҙы үҫтереүгә булышлыҡ итеү. “Күбәләк» ойошмаһы үҙ эшмәкәрлеген түбәндәге йүнәлештәр буйынса тормошҡа ашыра: - инклюзив белем биреү һәм үҫтереү; ғаиләләргә һәм быуын-ара мөнәсәбәттәргә булышлыҡ итеү; сәләмәтлек һәм сәләмәт йәшәү рәүеше; йәштәр сәйәсәте һәм потенциалды үҫтереү ;ирекмәнлек һәм шәфҡәтлелек; өҫтәмә белем биреү;  хоҡуҡи ярҙам.Беҙҙең төп бурысыбыҙ - әүҙем һәм яуаплы берләшмәне үҫтереү өсөн мөхит булдырыу, һәр кешенең потенциалын тормошҡа ашырыу өсөн шарттар тыуҙырыу. Бында һәр кемдең үҙенең идеяларын һәм хыялдарын тормошҡа ашырыу мөмкинлеге бар,- тип һөйләп үтте "Күбәләк" ойошмаһы тураһында Өфө фән һәм технологиялар университетының Стәрлетамаҡ филиалы педагогика һәм психология факультеты деканы Лилиә Абдуллина.
Лилиә Бакир ҡыҙы әйтеүенсә, педагогика һәм психология факультетында белем алған сит ил студенттары өсөн “Уҫылы-берҙәм ғаилә” фестивалендә ҡатнашыу башҡорт ҡунаҡсыллығын күреү генә түгел, ҙур күп милләтле ғаиләнең бер өлөшө булыу өсөн уникаль мөмкинлек тә.
- Студенттарыбыҙ  йолалар донъяһына хайран ҡалды. Милли мәҙәниәттәр үҙәгенең үҙенсәлекле тирмәләре Стәрлетамаҡ районы халыҡтарының һөнәрҙәре һәм көнкүреше менән танышыу майҙансығына әйләнде. Ҡайһы бер сит илдән килгән студенттар өсөн республикабыҙ менән бындай байрамса танышыу беренсегә булды. Әлбиттә, бындай осрашыуҙар сит ил студенттарыбыҙға тиҙерәк яраҡлашырға, ә беҙҙең барыбыҙға ла үҙебеҙҙе берҙәм, сәләмәт һәм ныҡлы йәмғиәттең бер өлөшө итеп хис итергә ярҙам итә,-  тип өҫтәне Лилиә Абдуллина.
- “Уҫылы-берҙәм ғаилә” асыҡ  спорт  фестивале һаулыҡты нығытыуға, тормоштоң тонусын күтәреүгә, ныҡлы, сәләмәт йәмғиәт булдырыуға йүнәлтелгән ысынбарлыҡ эштәр. Беҙ бөгөн ошо байрамды уртаҡлашҡандарҙың һәммәһенә ҙур рәхмәттәребеҙҙе еткерәбеҙ,- тип байрамды йомғаҡланы Стәрлетамаҡ районы хакимиәте башлығы урынбаҫары Эльвера Иманғолова.



Ишембай ҡалаһының нефть колледжы физик культура уҡытыусыһы,  милли көрәш буйынса тренер Айнур Кинйәбаев.
Ишембай ҡалаһының нефть колледжында милли көрәш буйынса түңәрәк алып барам. Үҙем бәләкәстән милли көрәш менән шөғөлләнәм, бөгөн дә ошо ҙур фестивалдә ҡатнашып, еңеү яуланым, ошондай ҡышҡы һабантуйға тиң фестивалде ойоштороусыларға ҙур рәхмәттәремде белдерәм, - тип тәъҫораттары менән бүлеште Айнур Илнур улы.

Айбулат Ишмөхәмәтов, махсус хәрби операция ҡатнашыусыһы,хаҡлы ялда.
Бөгөн мин саңғы ярышында беренсе урын яуланым, махсус хәрби операцияла Рәсәй геройы Алмаз Сафин исемендәге батальонда  ике йыл хеҙмәт итеп ҡайттым. Тәүҙә батальонда,аҙаҡтан полкта,67-се дивизияла ла иң оло хәрби мин,аҡһаҡал булдым. Бөгөнгө ярыштарҙа ҡатнашыуым күптәргә өлгө булғандыр, йәштәр бөтәһе лә афарин, дәррәү килеп фестивалдә ҡатнаштылар.