КӨҘГӨ УРМАН НИНДӘЙ ХӘҮЕФТӘР ЙӘШЕРӘ?

Башҡортостан Республикаһы Гигиена һәм эпидемиология үҙәгенең ҡала филиалы мәғлүмәттәре буйынса, хәл тик бер ҡала менән генә сикләнмәй. Күрше райондарҙа ла ағыуланыу осраҡтары теркәлә: Ишембайҙа һәм Стәрлетамаҡ районында икешәр осраҡ сусҡа бәшмәген (свинушка) ашау менән бәйле, ә Ғафури районында ағыулы бәшмәк (мухомор) менән ағыуланыу осрағы теркәлгән.

Бәшмәк йыйыу хәүефһеҙлеге ҡағиҙәләре
Күңелһеҙ эҙемтәләрҙән ҡасыр өсөн бәшмәк йыйыу ҡағиҙәләрен иҫтә тотоу мөһим:
Дөрөҫ кейенегеҙ: һыу үткәрмәй торған аяҡ кейеме, талпандан һаҡланыу саралары, зарядлы телефон һәм компас алығыҙ.
Үҙегеҙ менән һыу, ашарға еңелсә ризыҡ һәм бәләкәй генә дарыу ҡапсығы алығыҙ.
Тик йәш һәм ныҡ бәшмәктәрҙе генә йыйығыҙ, үҫеп киткән һәм йомшарғандарын алмағыҙ.
Игеҙәк бәшмәктәр тураһында онотмағыҙ: күп кенә ашарға яраҡлы бәшмәктәрҙең ағыулы «игеҙәктәре» бар. Әгәр шикләнһәгеҙ — бәшмәкте урманда ҡалдырыуығыҙ хәйерлерәк.
Автотрассалар, тимер юлдар, сәнәғәт предприятиелары, сүплектәр янында һәм эшкәртелгән баҫыуҙарҙа бәшмәк йыймағыҙ.

Ағыуланған осраҡта тәүге ярҙам
Ағыуланыу билдәләре (йөрәк болғаныу, ҡоҫоу, эс ауыртыу) барлыҡҡа килһә, кисекмәҫтән медицина ярҙамына мөрәжәғәт итергә кәрәк. Иҫтә тотоғоҙ: һуңлау ғүмер хаҡына төшөргә мөмкин.
Был ябай ҡағиҙәләрҙе үтәү «тыныс һунар»ҙан күңелһеҙ эҙемтәләрһеҙ ләззәт алырға ярҙам итер. Сөнки иң мөһиме — хәүефһеҙлек һәм һаулыҡ!