БЕЛОРУСТАР АЙЫРЫМ УРЫН БИЛӘЙ

Талантлылар нәҫеленән

Улар Белоруссиянан Стәрлетамаҡ ҡалаһына 70-се йылдарҙа күсеп килә. Виктория Николаевна үҙе Стәрлетамаҡта тыуған. 1970 йылдың башында ата-әсәһе Ленинградтан атаһы Николай Викторович Бурдыко хеҙмәт иткән урынға, йәғни 28949-сы ғәскәр часы урынлашҡан Стәрлетамаҡ ҡалаһына күсенә. Бурдыко ғаиләһендә ижади династия (йырлау, яҙыу, һүрәт төшөрөү) быуындан-быуынға күсә. Шуға күрә Виктория Николаевнаның шағир, йырсы, автор-башҡарыусы булыуы нәҫелдән килә. Яҙыусылыҡ һәләтенә 1928 йылда тыуған Бурдыко Николай Ефимович эйә була. “Ҡаршылыҡ”, “Икмәкселәр тураһында хикәйә”, “Йәшен бандаһы эҙҙәре”, шулай уҡ бәләкәй тыуған ил, тормош, эш тураһындағы әҫәрҙәре менән билдәле. Поэтик һәләткә, һүрәттә шиғриәтте сағылдырыуға, вокаль һәләткә 1943 йылда тыуған Бурдыко Николай Викторович эйә була. Ул “Яғымлы ҡала, “Башҡорт БАМ-ы”, “Ревизор”, “Хәтер”, “Кире билет” һ.б. әҫәрҙәре менән тарихта ҡалған. Әсәһе яғынан шулай уҡ ижади һәләтле династия һәм уларҙың береһе Александр Леонтьевич Матусевич 1902 йылда тыуған, уны бөтәһе лә АЛЕСЬ ағай тип йөрөткән. Ул журналист була һәм оҙаҡ йылдар Белоруссия Журналистар Союзында ағза булып тора. АЛЕСЬ буласаҡ ҡәләм оҫталарының бер нисә быуыны өсөн ысын уҡытыусы була.

Ата-бабалары данлы юл үткән

Викторияның ата-бабалары Борисовский районында Березина йылғаһы буйында йәшәгән, 1812 йылғы ағым һуғышы ваҡытында был йылға Наполеон армияһының һәләк булыуына шаһит була. Виктория Николаевнаның ҡарт олатаһы Андрей Лаврентьевич (1796 йылғы) һәм ҡарт олатаһының атаһы Лаврентий Семенович (1764 йылғы) Наполенға ҡаршы һуғыша, ул 48 йәшендә Наполеон Рәсәйгә һөжүм итә, Лаврентий һәм уның ике улы Кузьма һәм Андрей француздарға ҡаршы көрәшеү өсөн партизандарға китә. Хәҙер башҡорт ҡатын-ҡыҙҙарыныҡы һымаҡ француз яулыҡтарын улар француз армияһын тао-мар иткәс тыуған илдә ҡалған ҡатындарына бүләккә алып ҡайта.

Һәр яҡлап булдыҡлы шәхес

Викторияның ижади һәләте мәктәп йылдарында уҡ күренә, күп шиғырҙары шунда уҡ гитарала башҡарылған көй менән тыуа. 2000 йылдан уҡ репертуарында балалар өсөн музыкаль әҫәрҙәр ҙә барлыҡҡа килә башлай. 2018 йылда Любовь Никифорова менән авторҙашлыҡта “Кланяйтесь оставшимся в живых” йыры “Бөйөк Еңеү Геройҙары – 2018” Бөтә Рәсәй кимәлендәге әҙәби конкурс еңеүселәре иҫәбенә инә. Ә 2019 йылда Виктория Пивоварцева тарафынан яҙылған ике  йыр: “Күккә киткәндәрҙе иҫкә ал”, “Афған балалары иҫкә ала” йыр номинацияһында еңеүселәрҙең тәүге туғыҙы иҫәбенә инә. Уның әҫәрҙәре 2020 йылда Бөйөк Еңеүҙең 75 йыллығына арналған “Георгиевская лента” китабына инә, ә үҙе “Йыл шағиры” милли әҙәби премияһына лайыҡ була. Шулай уҡ 2018-2019 йылдарҙағы конкурс эштәренең китап йыйынтығында Бөйөк Еңеү геройҙары Бөтә Рәсәй әҙәби конкурсында; 3 томлыҡ китаптар серияһында “СВО Культура спасет мир” китабы баҫыла. Бынан тыш “Өйгә ҡайтыу” ваҡытлы авторҙар әҫәрҙәре йыйынтығы баҫыла. Шулай уҡ музыкаль поэтик балалар өсөн әҫәрҙәр “Балалар планетаһы” Белоруссия Республикаһының Милли китапханаһында һәм Рәсәйҙең 16 төп китапханаһында ҡулланыла. Викторияның әҫәрҙәре менән Стәрлетамаҡ ҡалаһының 4-се китапханаһында танышырға мөмкин. Виктория башҡорт, татар, әрмән телдәрендәге шиғырҙарҙы рус теленә тәржемә итә. Мәҫәлән, “Башҡортостан” йырын (музыка авторы Дияна Ишниязова) һүҙҙәр авторы Зөфәр Зәки улы Вәлитовтың  ризалығы менән рус теленә тәржемә иткән.

Хеҙмәте юғары баһалана

Виктория ҡалабыҙҙың “Өмөт” мәктәптән тыш эш үҙәге муниципаль автономиялы өҫтәмә белем биреү учреждениеһында эшләй. “Балалар планетаһы” инклюзив вокаль студияһы менән етәкселек итә, балаларҙа, шул иҫәптән сәләмәтлектәре сикләнгән балаларҙың да һәләтен үҫтерә.

Уның хеҙмәте бихисап Рәхмәт хаттары менән баһаланған.  Улар араһында әҙерлек кимәлен компетентлы баһалағаны өсөн Башҡортостан Республикаһы Мәғариф һәм фән министрлығының, БР Тышҡы иҡтисади бәйләнештәр министрлығының, Стәрлетамаҡ ҡалаһы ҡала округы хакимиәтенең йәштәрҙе патриотик тәрбиәләүгә ҙур өлөш индергәне өсөн, шулай уҡ Рәсәй Федерацияһында милләт-ара тыныслыҡты һәм татыулыҡты нығытыуға индергән өлөшө өсөн Дәүләт Думаһының милләттәр эштәре буйынса комитетының Рәсәй Федерацияһы Федераль йыйылышының Рәхмәт хаттары, “Дрброволец” ирекмәнлек эшмәкәрлеге өсөн Башҡортостан Республикаһының Почет билдәһе лә бар.

Шеврондар яугирҙар өсөн һаҡланыу сараһы

Уның күңелендә илһам бар, ул бит көс бирә. Ә балалар менән эшләү, улар араһында үҙенсәлекле балалар ҙа бар. Виктория Николаевна һәр ваҡыт ҡул эштәре менән мауыға, яугирҙар өсөн шеврондар сигеп эшләй. Уға әсәһе һәм тәрбиәләнеүселәрҙең ата-әсәләр ярҙам итә. Виктория Николаевна, әгәр ихлас йөрәк һәм изге теләктәр менән эш итһәк, шеврондар балалар өсөн ысын һаҡлыҡ һәләтенә эйә, тип ышана. Яугирҙар йыш ҡына православие темаһына шеврондар эшләүҙе һорай, улар сиркәүҙә руханиҙар ризалығы менән башҡарылһа, ә мосолмандар өсөн урындағы хәҙрәт менән килешеп, махсус проект әҙерләйҙәр, беҙҙең егеттәр өсөн дә махсус шеврондар яһайҙар. Әлбиттә, быға ихлас ышаныу бар.

Бынан тыш ҡалала йәшәүсе белорустар Стәрлетамаҡта үткәрелгән бөтә мәҙәни сараларҙа әүҙем ҡатнаша. Үҙ халҡыбыҙҙың күргәҙмәләрен булдыра, йолаларыбыҙҙы күрһәтә, йыр-бейеүҙәребеҙҙе башҡара, шул рәүешле милли-ара татыу мөхит булдырыуға булышлыҡ итәбеҙ, – тип бәйән итә Виктория Николаевна. Мәҫәлән, ул үҙе 2012 йылда Шәжәрә байрамында ҡатнашып, үҙ ғаиләһенең Наполеонға ҡаршы һуғышҡан династияһын күҙ алдына баҫтырған. Әйткәндәй, гәзит баҫмаға әҙерләнгән көндәрҙә Стәрлетамаҡҡа Белоруссиянан бер төркөм ҡунаҡтар килеп төштө. Барановичи ҡалаһы вәкилдәре Стәрлетамаҡта йәшәгән яҡташтарын күргәс, бындағы милли-ара татыулыҡҡа, мәҙәни үҫешкә һоҡланыуын белдергән. Барановичи ҡалаһы башҡарма комитеты рәйесе урынбаҫары Элла Сташенко хатта Стәрлетамаҡта белорустар йәшәгәнгә аптырап, уларҙың үҙ мәҙәниәтен онотмауға бик шатланған. Виктория Пивоварцева етәкселегендәге мираҫ (Спадчына) эшенә уңыштар теләп, ҡалабыҙ мәҙәниәтенә артабан да өлөш индереүҙәрен күреп йәшәргә яҙһын. 

Римма ҒӘЛИМОВА.

Фотолар Виктория Пивоварцеваның шәхси архивынан һәм Э.Шәймәрҙәнов сәхифәһенән алынды.

ТЕМАНЫ ДАУАМ ИТЕП:

Стәрлетамаҡта Барановичи ҡалаһынан (Беларусь Республикаһы) рәсми делегация килде

Делегация составына Барановичи ҡала башҡарма комитеты рәйесе Максим Анатольевич Антонюк, уның беренсе урынбаҫары Элла Евгеньевна Сташенко, «Баранович автоагрегат заводы» асыҡ акционерҙар йәмғиәте директоры Виталий Александрович Юркевич, «Торгмаш» асыҡ акционерҙар йәмғиәте директоры Николай Васильевич Козарез һәм «Доманов производство-сауҙа комбинаты» асыҡ акционерҙар йәмғиәте директоры Владимир Михайлович Бурдь инә.

 Хакимиәт башлығы Эмиль Владиславович Шәймәрҙәнов һәм уның урынбаҫарҙары ҡунаҡтарҙы Стәрлетамаҡ менән таныштырҙы, хакимиәттең эше һәм структураһы тураһында һөйләне, ҡала идаралығы тәжрибәһе менән уртаҡлашты. Шулай уҡ сәфәр сиктәрендә ҡунаҡтар   ҡаланың алдынғы сәнәғәт предприятиеларында булды: «Башҡортостан сода компанияһы», «Стәрлетамаҡ механика заводы», «Вагондар ремонтлау заводы», «Станкостроение» коммерцияға ҡарамаған ойошмаһы уларҙа ҙур ҡыҙыҡһыныу уятты.

 - Барановичтарҙың Һәм Стәрлетамаҡтың уртаҡлыҡтары күп-шул иҫәптән сәнәғәт профиле лә оҡшаш. Белоруссия предприятиелары Башҡортостандың бер нисә предприятиеһы менән хеҙмәттәшлек итә. Визит яңы берлектәге проекттар һәм ҡалаларыбыҙ араһында эшлекле бәйләнештәрҙе нығытыу өсөн яҡшы нигеҙ булыр, тип ышанам, - тине Эмиль Владиславович.