+24 °С
Болотло
Ишеттегеҙме әле?
1 Апрель 2022, 08:08
«Өфө» һыу аҫты кәмәһе Санкт-Петербургта һыуға төшөрөлдө һәм үҙенең тәүге походына әҙерләнә
Бөгөн Башҡортостан Башлығы Радий Хәбиров Санкт-Петербургта «Өфө» һыу аҫты кәмәһен һыуға төшөрөү тантанаһында ҡатнашты.
«Өфө» һыу аҫты кәмәһе Санкт-Петербургта һыуға төшөрөлдө һәм үҙенең тәүге походына әҙерләнә
«Бөгөн карап төҙөүселәребеҙ сираттағы хеҙмәт еңеүен билдәләй, беҙ Башҡортостандың баш ҡалаһы хөрмәтенә аталған ҙур дизель-электр һыу аҫты кәмәһен һыуға төшөрәбеҙ. Караптарға ҡалаларыбыҙҙың исемен биреү изге йолаға әүерелгән. Санкт-Петербург менән Өфөнө тарих биттәре бәйләй. Бөйөк Ватан һуғышы йылдарында байтаҡ предприятиелар Өфөгә эвакуацияланған, ә беҙҙең халыҡ унда яҡлау тапҡан. Радий Фәрит улы, бөгөн Башҡортостан халҡына Ленинградтан күсеп килергә мәжбүр булғандарға күрһәткән ярҙамы өсөн рәхмәт әйткем килә. Бик күптәре һеҙҙең республикала йәшәргә ҡалған. Ветерандар хаҡында нисек хәстәрлек күреүегеҙҙе беләбеҙ. Был предприятие Петр Беренсенең хеҙмәте, быйыл уға 350 йыл тула. Хәҙер Санкт-Петербургта 50 карап төҙөлә, бының өсөн Оборона министрлығына рәхмәт белдерергә теләйем. Бик ҡатмарлы осор, әммә беҙ бергә, бергә булғас, беҙ еңәбеҙ», — тине Санкт-Петербург губернаторы Александр Беглов.
«Бөгөн мин ныҡ тулҡынланам, сөнки был — илебеҙ һәм республикабыҙ, уның баш ҡалаһы өсөн тарихи көн. Бөгөн Башҡортостандың баш ҡалаһы исемен йөрөткән ҙур һыу аҫты крейсерын һыуға төшөрәбеҙ. Өфө — Сергей Аксаков, Михаил Нестеров, Рудольф Нуриев, Илдар Абдразаҡов һәм башҡа бик күптәрҙең исемдәре менән дан тотҡан миллионлы ҡала. Бөгөн мин Санкт-Петербург губернаторына республиканың Диңгеҙселәр йыйылышы мөрәжәғәтен хуплаған өсөн рәхмәт белдерәм, «Адмиралтейские верфи» эшселәренә ҙур рәхмәт. Диңгеҙ традициялары беҙҙең республикаға ят түгел. 34 меңдән ашыу яҡташыбыҙ Хәрби-диңгеҙ флотында хеҙмәт иткән, күбеһе күренекле хәрби етәкселәр булып киткән. Вице-адмирал Игорь Мөхәмәтшин, контр-адмирал Батыргәрәй Зөлҡәрнәев, Рәсәй Геройы Константин Сурков та бөгөн бында, Тыуған илебеҙ улар менән ғорурлана. Бөгөн беҙҙең өсөн яуаплы һәм үҙенсәлекле көн. Был көндәрҙә беҙҙең армия һәм флот айырыуса ярҙамға мохтаж. Беҙҙең Ҡораллы көстәр Президентыбыҙ ҡуйған бурысты башҡарып сығыр тип ышанабыҙ», — тине Башҡортостан Башлығы Радий Хәбиров.
«Өфө» һыу аҫты кәмәһе командиры, өсөнсө ранг капитаны Андрей Барков Радий Хәбировҡа экипажға шефлыҡ иткәне өсөн рәхмәт белдерҙе һәм республиканы ҡыйын хәлдә ҡалдырмаҫҡа вәғәҙә бирҙе. Башҡортостан һеҙҙең өсөн икенсе бәләкәй ватанға әүерелер, тип ышандырҙы уларҙы республика етәксеһе.
Башинформ
