Халыҡ-ара туған тел көнөндә тематик флешмобтарҙа республиканың билдәле шәхестәре ҡатнашты.

Мәкәрим Төхвәтшин исемендәге республика һуҡырҙар өсөн махсус китапханаһында «туған телем, минең менән дуҫ бул» флешмобы үтте, уның барышында башҡорт, рус, сыуаш шағирҙарының әҫәрҙәре яңғыраны.

Бөтә донъя башҡорттары ҡоролтайы шиғри флешмоб үткәрҙе. Ҡатнашыусылар дүрт юллыҡтарҙы уҡыны, видеоға төшөрөп, «Бәйләнештә»ге сәхифәһенә һалды. Республика Флешмобын Ә.Вәлиди исемендәге милли китапхана ла ойошторҙо. Ҡатнашыусылар шиғырҙы йәки әҫәрҙән өҙөктө туған телдә уҡып, видеояҙмаға төшөрөп, уны «Бәйләнештә»селтәренә һалдылар.

Республика халыҡ ижады үҙәге "туған телдә уҡыйбыҙ" акцияһын ойошторҙо, тип хәбәр ителә "Башҡортостандың Мәҙәни донъяһы"порталында. Флешмобта республиканың билдәле шәхестәре лә ҡатнашты. Тематик флешмоб Октябрьский ҡалаһында ла үтте. Уларҙы мәҙәниәт учреждениелары ойошторҙо. Ҡала халҡы туған телендә шиғырҙар уҡыны һәм социаль селтәрҙәге сәхифәләренә яҙмалар һалды.