Ювелир салоны хеҙмәткәре 12 миллион һумлыҡ биҙәүестәрҙе урлауҙа ғәйепләнә

 «Башинформ» агентлығына үҙ сығанағы хәбәр итеүенсә, 19 ноябрҙә 22 йәшлек ҡыҙ, эш көнө тамамланғас, ҡиммәтле биҙәүестәрҙе ҡумталарға тултырған да ҡуртымға алынған фатирына алып ҡайтҡан. Һуңынан ул шул уҡ ошо ҡумталар менән ниндәйҙер машинаға ултырып, билдәһеҙ йүнәлештә сығып киткән. Ҡайһы бер мәғлүмәттәр буйынса, ҡыҙ Өфөгә Түбәнге Новгород өлкәһенең Дзержинск ҡалаһынан килгән.

Коллегалары полицияға мөрәжәғәт иткән.

«Башинформ»ға Башҡортостан Республикаһы буйынса Эске эштәр министрлығының матбуғат хеҙмәтенән хәбәр итеүҙәренсә, әле ҡыҙҙы эҙләйҙәр.

«Рәсәй Эске эштәр министрлығы Өфө ҡалаһы буйынса идаралығының 9-сы полиция бүлегендә ошо осраҡ буйынса енәйәт эше ҡуҙғатылған. Полиция хеҙмәткәрҙәре эҙләү эштәре башлаған»,  — тип белдерҙеләр ведомствола.

Башинформ.