Аҡсаны биргәнсе… башта яҡындарығыҙға шылтыратығыҙ!

Стәрлетамаҡ полицияһының дежур бүлегенә мутлашыусылар ҡорбаны булған 96 йәшлек ҡатындан ғариза килгән. Ҡатын-ҡыҙ, мутлашыусыларҙың телефон шылтыратыуына ышанып, бөтә аҡсаһын юғалта. Яҡынса мәғлүмәттәр буйынса, енәйәт классик, әммә бынан кәм булмаған циник схема буйынса башҡарылған. Зыян күреүсенең стационар телефонына билдәһеҙ кеше шылтырата, ул үҙен курьер тип таныштыра. Ир пенсионерға ҡыҙының магазиндағы быяланы ватҡанын һәм ярсыҡтар бәлиғ булмаған баланың башын йәрәхәтләгәнен хәбәр итә. Мәсьәләне көйләү һәм «дауалау» өсөн түләү өсөн ялған курьер 1 миллион һум аҡса биреүҙе талап итә. Енәйәтсе аныҡ күрһәтмәләр бирә: ҡулаҡса әҙерләргә, уны гәзиткә төрөргә, шулай уҡ зыян күргән яҡ өсөн тиҙ-арала постель кәрәк-яраҡтары һәм таҫтамал да һалырға ҡуша.

Пенсионер ҡатын өйөнә килгән курьерҙарға 300 мең һум күләмендәге сумманың беренсе өлөшөн тапшыра. Бер аҙҙан мутлашыусылар ҡорбанға тағы ла шылтыратып, ҡалған сумманы аҙыҡ-түлек менән бергә тапшырыуҙы талап итә. Күрһәтмәләрҙе үтәп, ҡатын ҡалған 915 мең һумды гәзиткә төрөп, төргәкте шул уҡ кешеләргә ҡабаттан тапшыра. Пенсионерҙың «бәла-ҡазаға тарыған» ҡыҙы бәйләнешкә сыҡҡас, алдашыу асыла. Уның менән барыһы ла яҡшы икәнен белгәс, зыян күреүсе үҙен мутлашыусылар алдағанын аңлай. Полиция граждандарға иҫкәртә: әгәр һеҙгә бәләгә тарыған туғанығыҙҙан йәки аҡса талап иткән «курьерҙарҙан» шылтыратыу килһә, шунда уҡ һөйләшеүҙе туҡтатығыҙ һәм яҡындарығыҙға шылтыратығыҙ. Бер ниндәй шарттарҙа ла сит кешеләргә аҡса бирмәгеҙ.

Римма ҒӘЛИМОВА.