+30 °С
Болотло
Хәтер
20 Апрель 2021, 09:45
Ҡайғылы хәбәр
Республикабыҙ сәнғәтенең күренекле вәкиле, Башҡортостандың атҡаҙанған сәнғәт эшмәкәре, билдәле рәссам, сценограф Азамат Лоҡман-Хәким улы Ғиләжев 65 йәшендә вафат булды.
Ул 1956 йылдың 1 апрелендә Өфө ҡалаһында Бөйөк Ватан һуғышында ҡатнашҡан башҡорт яҙыусыһы, журналист Хәким Ғиләжев ғаиләһендә тыуған.
Азамат Ғиләжев 1980 йылда Өфө дәүләт сәнғәт институтын тамамлай. Эш башлау дәүерендә, тәжрибә уртаҡлашыу маҡсатында, 1984 йылда Рәсәйҙең Бәләкәй театрында, 1986 йылда Ленин комсомолы исемендәге Мәскәү театрында стажировка үтә.
Азамат Ғиләжев төрлө йылдарҙа Рус академия драма театры, Мәжит Ғафури исемендәге Башҡорт дәүләт академия драма театры, Стәрлетамаҡ башҡорт драма театры, Өфө “Нур” татар дәүләт театры кеүек республиканың алдынғы театрҙарында ҡуйыусы рәссам, баш рәссам кеүек вазифаларҙа эшләгән.
Стәрлетамаҡ башҡорт драма театрында эшләгән йылдарында (1995 – 2009) сәхнәгә ҡуйылған “Ҡабул ит уларҙы, Шамбала!” (Б.Гаврилов), “Онотолған доға” (Ф.Бүләков), “Роза тамғаһы” (Т.Уильямс), “Инә бүре ҡарғышы” (Х.Иргалин), “Ут күршеләр” (К.Аҡбашев), “Мин һине бер кемгә лә бирмәйем” (В.Жеребцов) һәм башҡа күп спектаклдәр Азамат Ғиләжевтың исеме менән бәйле.
Стәрлетамаҡ дәүләт театр-концерт берләшмәһе коллективы башҡорт драма театрына нигеҙ һалыусыларҙың береһе, театрҙың тәүге художество етәксеһе, башҡорт театрын юғары кимәлгә күтәргән бихисап спектаклдәр режиссеры, Башҡортостандың атҡаҙанған сәнғәт эшмәкәре, Салауат Юлаев исемендәге дәүләт премияһы лауреаты Гөлдәр Мозафар ҡыҙы Ильясованың, шулай уҡ мәрхүмдең яҡындарының һәм туғандарының ауыр ҡайғыһын уртаҡлаша, уларға сабырлыҡ теләй.
Стәрлетамаҡ дәүләт театр-концерт берләшмәһе коллективы.
