Батырҙарыбыҙ иҫтәлегенә таҡтаташ асылды

Сарала мәктәп уҡыусылары, яугирҙарҙың яҡындары ҡатнашты.

- Беҙ матур мәктәптәрҙә, тыныс тормошта йәшәйбеҙ, шул уҡ ваҡытта ил сигендә һалдаттарыбыҙ ҡатмарлы шарттарҙа дошман менән алыша. Тыныс тормоштоң һәр минутының ҡәҙерен белеп йәшәйек. Гимназия тупһаһын үткән һайын, бында геройҙар булғанын онотмағыҙ, илебеҙ мәнфәғәттәре өсөн ғүмерен биргән һалдаттарыбыҙ тере миҫал булып тора. Уҡыусыларға тырышып уҡырға, лайыҡлы граждандар булып үҫеп етеүегеҙҙе теләйем, тине Рөстәм Фәрит улы тантана барышында.

Таҡтаташ аша яҡты донъяларға ҡарап торған егеттәребеҙҙең тормошо беҙҙең хәтер аша дауам итә. "Набат" Чечен республикаһында ҡораллы конфликтта ҡатнашыусылар союзы рәйесе Илдус Мәнәпов һүҙҙәре "Һалдат ике тапҡыр һәләк була, беренсе тапҡыр - яу яланында,  икенсегә - уның тураһында хәтер онотолған саҡта", хаҡлылыр. Яугирҙарыбыҙҙы онотмайыҡ.

"Ашҡаҙар" гәзите редакцияһы һәләк булып ҡалған егеттәребеҙҙең яҡындарының ҡайғыһын уртаҡлаша.