Стәрлетамаҡта легаль булмаған 18 микроавтобусҡа арест һалынған

Радий Хәбиров кәңәшмә барышында барлыҡ пассажир ташыусы транспорттар законлы нигеҙҙә эшләргә тейешлеген билдәләп үтте.

Транспорт өлкәһен күҙәтеү хеҙмәте 24 ғинуарға тиклем 26 микроавтобусҡа арест һалған, шуларҙың 18-е Стәрлетамаҡтан булған.

“Стәрлетамаҡ-Салауат-Стәрлетамаҡ” маршруты буйынса йөрөгән шәхси микроавтобустарға арест һалыу был ҡалаларға көн һайын йөрөп эшләгәндәр араһында шау-шыу тыуҙырҙы. Сөнки Стәрлетамаҡтан Салауатҡа йөрөгән шәхси микроавтобустарҙа юл хаҡы ла осһоҙ (юл хаҡы – 50 һум), хатта өҫтәмә түләү алмайынса, ҡала урамдары аша үткән. Ә “Башавтотранс” автобустарында юл хаҡы – 52 һум, әммә улар автовокзалға тиклем генә йөрөй. Тимәк, “Башавтотранс” автобустарында, автовокзалға килеп төшкәс, тағы ла юл хаҡы түләп, ҡала маршруткаларына ултырырға кәрәк була. Әлбиттә, был хәл пассажирҙарҙа ризаһыҙлыҡ тыуҙырған.

Радий Хәбиров үткәргән оператив кәңәшмәлә Стәрлетамаҡ-Ишембай (Урман-Бишҡаҙаҡ аша) һәм Стәрлетамаҡ-Ҡолғона маршруттарын асыу планлаштырылыуы тураһында хәбәр ителде.