+24 °С
Болотло
Мәғариф
15 Декабрь 2021, 05:41
Уҡыусыларҙың Яңы йыл каникулдары 31 декабрҙән башлана
Башҡортостандың мәғариф министры Айбулат Хажин яңы коронавирус инфекцияһы менән көрәш буйынса оператив штаб ултырышында республика мәктәптәрендә яңы йыл каникулдарының 31 декабрҙә башланып, 16 ғинуарғаса дауам итәсәген билдәләне. Йәғни уҡыусылар дүшәмбе, 17 ғинуарҙа, мәктәпкә бара.
Уҡыусыларҙың Яңы йыл каникулдары 31 декабрҙән башлана
«Республиканың белем биреү учреждениеларында киҫкен респиратор вирус инфекцияһы һәм грипп буйынса ҡатмарлы хәл килеп тыуҙы, 62 339 уҡыусы, 1 083уҡытыусы сирләй. Шулай ҙа яңы йыл каникулдары киҫкен респиратор вирус инфекцияһы менән ауырыу күрһәткестәрен ярайһы уҡ кәметергә мөмкинлек бирер, тип иҫәпләйҙәр Роспотребнадзорҙа», — тине ведомство башлығы.
Әйткәндәй, Рәсәйҙең күпселек төбәктәрендә уҡыусыларҙың яңы йыл каникулдары иртәрәк — 27 декабрҙә башлана. Балалар 10 ғинуарҙа уҡырҡа бара.
Бынан алдараҡ Башҡортостан Башлығы Радий Хәбиров республика мәктәптәрендә COVID-19 таралыуы сәбәпле каникул тағы бер аҙнаға оҙайтылыуы мөмкин тип билдәләгәйне.
Башинформ.
