- Уҡыу ул – көсөрғәнешле хеҙмәт, уның һөҙөмтәләрен күреү тағы ла ҡиммәтерәк. Беҙҙең уҡыусыларҙың уңыштарында  уҡытыусыларҙың һәм уларҙың –ата-әсәләренең ҙур ҡаҙанышы ята. Шундай лайыҡлы дауам итеүселәре булған ҡала уңышҡа һәм яңырыуға дусар . Һеҙгә артабан да һөнәри уңыштар теләйем. Ошо олимпиадаларҙағы һеҙҙең еңеүегеҙ  алдағы юғары ҡаҙаныштарығыҙҙың тәүге буҫағаһы булһын , -  тине ҡала хакимиәте башлығы Рөстәм Ғәзизов.  

Ҡалған тәбрикләүселәрҙең ҙә сығыштары бик фәһемле булды. Театрлаштырылған әкиәттән башланған сара Пионерҙар һарайы һәм театр-концерт берләшмәһе, мәктәп уҡыусыларының ижади сығыштары менән үрелеп барҙы. Ә инде алдынғы белем усаҡтарына килгәндә , беренселекте хөрмәтле 1 гимназия яуланы. Ошо еңеүселәрҙе данлағанда уларҙың  уҡытыусыларына, ата-әсәләренә ҡарата ла күңелдәрҙе ғорурлыҡ хисе биләне.

ТЕМАНЫ ДАУАМ ИТЕП…

Яңыраҡ 3-сө башҡорт лицей интернатында уҡыу йылын йомғаҡлау, төрлө олимпиадаларҙа еңеүселәрҙе данлау сараһы үтте. Был тантаналы сараға лицей-интернатын 1999 йылда тамамлаған  Айҙар Айрат улы Хәсәнов, 2004 йылда тамамлаған  Дмитрий Сергеевич  Рыжов һәм 2010 йылда тамамлаған Алмас Роберт улы Кирәев та килгән ине. Уларҙың һәр ҡайһыһы йылы хәтирәләре менән уртаҡлашты һәм үҙҙәрен уҡытҡан ғәзиз уҡытыусыларына уҡыу йылы тамамланыуға өс көнлөк ялға юлламалар бүләк иттеләр. Әйткәндәй, тәүге икеһенең балалары ла бында уҡый икән. Лицей-интернат уҡыусыларының ҡала, республика һәм Рәсәй буйынса уңыштарға ирешеүҙәре хаҡында яҙып сыҡҡайныҡ инде. Шул уҡыусыларҙы ҡотлағанда бүләктәр менән тап ошо атап киткән өс элекке уҡыусы ярҙам иткән дә инде. Төрлө кимәлдәге еңеүселәрҙе, призерҙарҙы ҡотлағандан һуң, лицей-интернаттың 2022-2023 уҡыу йылындағы Йыл уҡыусыһын билдәләнеләр. Шулай итеп, Йыл уҡыусыһы тип ҡала, республика һәм Бөтә Рәсәй кимәлендәге олимпиадаларҙа бер нисә тапҡыр еңеүсе Динис Ғизәтуллин танылды.

Римма ҒӘЛИМОВА.

Сергей Крамсков фотоһы.