Һеҙ ҡабыҙған шәмдең яҡтыһы быуаттан-быуатҡа күсһен!

Республиканың был абруйлы инновацион белем биреү учреждениеһында Башҡортостандың төрлө райондарынан һәм ҡалаларынан балалар уҡый. Йыл һайын 3-сө башҡорт лицей-интернаты ҡала инновацион белем биреү учреждениеларының предмет олимпиадалары рейтингында лидерҙар иҫәбенә инә. Был белем усағының олимпиадалар һөҙөмтәһе буйынса Стәрлетамаҡтың дөйөм белем биреү ойошмалары араһында – лидер, ә мәктәп уҡыусыларының Бөтә Рәсәй олимпиада һөҙөмтәләре буйынса Стәрлетамаҡтың дөйөм белем биреү учреждениелары араһында призер булараҡ ҡалала ғына түгел, республикала, хатта Рәсәй кимәлендә таныйҙар. Сөнки ул математика һәм тәбиғи фәндәрҙе үҫтереүҙә Рәсәйҙең ТОП-200 яҡшы мәктәптәре иҫәбендә. Лицей уҡыусылары йыл һайын Башҡортостан Башлығы премияһын алырға хоҡуҡ биргән олимпиада еңеүселәре һәм призерҙары булалар. Шулай уҡ предмет буйынса БДИ-ла 100 балл йыйып, имтихан бирмәй генә ВУЗ студенты булып китәләр. Һайлауҙы уңышлы уңышлы үтеп «Сириус» белем биреү үҙәгенә эләгәләр. Башҡортостан Республикаһы Башлығының һәм Стәрлетамаҡ ҡала округы хакимиәте башлығының стипендиаты булалар.

  - Ошо уңыштарҙың башында педагогик коллективтың уҡытыусылары һәм уҡыусылары тора, бында туғанлыҡ атмосфераһы хөкөм һөрә.  Мин һеҙҙең учреждениены, гендерлы ҡарашты һәм интеллектуаль элитаны яратам - тине ҡала хакимиәтенең мәғариф бүлеге начальнигы урынбаҫары Ольга Ивановна Шитикова.  Ҡала мәғариф бүлегенең әйҙәүсе инспекторы Айгөл Фәнил ҡыҙы Кутузова ла белем усағына артабан да уңыштар теләне. Лицей-интернаттың уҡытыусылары һәм тәрбиәселәре Рәсәй һәм Башҡортостан Фән һәм мәғариф министрлығының һәм ҡала мәғариф бүлегенең Почет грамоталарына һәм рәхмәт хаттарына лайыҡ булды.

 - Лицейҙа талантлы педагогтар плеядаһы эшләй һәм ил өсөн иң юғары кимәлдәге кадрҙар әҙерләй, 3-сө БЛИ уҡытыусылары һәм уҡыусылары Стәрлетамаҡ ҡалаһы башҡорттары ҡоролтайының бөтә башланғыстарында әүҙем ҡатнаша. 30 йыл эшләү дәүерендә лицей йөҙҙәрсә сығарылыш уҡыусыларына тормошҡа юллама бирә, ысын мәғәнәһендә кадрҙар тимерлеге булып тора, -  тип билдәләне Стәрлетамаҡ башҡорт ҡатын-ҡыҙҙары йәмғиәте етәксеһе, урындағы ҡоролтай ағзаһы  Зөлфиә Әбделхәй ҡыҙы Йәғәфәрова. Ул ҡаланың йәмәғәт эшендә әүҙемлек күрһәткән өсөн ҡала ҡоролтайы исеменән белем биреү учреждениеһы уҡытыусыларын һәм тәрбиәселәрен бүләкләне.

Шулай уҡ белем усағын ҡотларға мәртәбәле ҡунаҡтар ҙа килгәйне.  Улар араһында Волга буйы Федераль округының Ространснадзор территориаль идаралығы начальнигы урынбаҫары Тимур Рафис улы Мөхәмәтйәнов, Өфө дәүләт нефть техник университетының йәштәр технопаркынан Флүр Әмир улы Шаһисолтанов, Өфө фән һәм технологиялар университеты Стәрлетамаҡ филиалының  математика һәм мәғлүмәт технологиялары факультеты деканы Руслан Халиҡ улы Кәримов ихлас ҡотланылар һәи лицеистарға артабан да илебеҙ шөһрәтен үҫтереүселәр рәтендә булыуҙарын теләнеләр. Шулай уҡ ҡалабыҙҙың Жәлил Киекбаев исемендәге 3-сө гимназия директоры Айгөл Басир ҡыҙы Шаһисолтанова, 1-се мәктәп-интернат директоры Галина Николаевна Козлова, 9-сы мәктәп директоры Нәсимә Хантимер ҡыҙы  Ҡасимова һәм башҡалар  бергә хеҙмәттәшлек итеүҙәрен һыҙыҡ өҫтөнә алып, ошо дуҫлыҡтың дауамлы булыуын теләнеләр. Юбилей тантанаһына арналған сарала белем усағының тарихы, бөгөнгөһө күҙ алдына баҫты, киләсәге төҫмөрләнде. Ҡайҙа ғына барһалар ҙа лицеистар ҡалабыҙҙың ғорурлығы булып ҡала, илебеҙгә файҙа килтерә. Сәхнәлә 30 йыл элек уҡыусылар ҙа, бөгөнгө лицеистар бергәләп лицей тормошон күҙ алдына баҫтырҙылар.  Барыһы ла иң ҙур рәхмәттәрен белем усағының ветерандарына һәм әлеге уҡытыусыларына, тәрбиәселәренә еткерҙе. Был рәхмәттәргә һәм ҡотлауҙарға беҙ ҙә ихлас ҡушылабыҙ. Һеҙ яҡтыртҡан шәмдең яҡтыһы быуаттан – быуатҡа күсһен.

Римма ҒӘЛИМОВА.

Фотолар: белем усағы сайтынан алынды.