Ауылдарға юғары тиҙлекле интернет килә

"Башинформсвязь" компанияһы төбәктең социаль әһәмиәтле 722 объектына сүсле-оптик селтәр төҙөнө. 389 фельдшер-акушерлыҡ пункты, 215 мәғариф учреждениеһы, 88 ауыл хакимиәте һәм Ғәҙәттән тыш хәлдәр министрлығының 30 бүлексәһе юғары тиҙлекле интернетҡа тоташыу мөмкинлеге алды.
- Милли проект сиктәрендә социаль әһәмиәткә эйә объекттарҙы интернетҡа тоташтырыу республика ауылдары эсендә элемтә инфраструктураһын үҫтереүгә ярҙам итә. Проектты ғәмәлгә ашырыу һөҙөмтәһендә республика халҡы электрон хеҙмәттәргә инеү мөмкинлеге аласаҡ, - тип һөйләне һанлы үҫеш министры Геннадий Разумикин.

- Беҙ өс ай эсендә республика буйынса бик ҙур күләмдә эш башҡарҙыҡ. Әлеге телеком-инфраструктура төбәктең киләсәктәге һанлы үҫеше өсөн ышаныслы нигеҙ буласаҡ, - тип асыҡлыҡ индерҙе "Башинформсвязь" компанияһының генераль директоры Сергей Алферов.