+2 °С
Болотло
Бөтә яңылыҡтар
10
Милли проекттар
15 Ғинуар 2020, 10:00
Быйыл республика ауылдарында бәләкәй эшҡыуарлыҡҡа дәүләт ярҙамы 1 миллиард һум кимәлендә һаҡлап ҡалына
#миллипроекттар#төбәкпроекттары2020 йылда Башҡортостан Хөкүмәте ауыл биләмәләрендә бәләкәй эшҡыуарлыҡҡа дәүләт ярҙамы күләмен 1 миллиард һум кимәлендә һаҡлап ҡалырға планлаштыра, тип хәбәр итәләр республика Ауыл хужалығы министрлығының матбуғат хеҙмәтенән.
«Милли проекттарҙы, грант программаларын һәм урындағы башланғыстарға ярҙам итеү программаһын тормошҡа ашырыу барышында ауылда бәләкәй эшҡыуарлыҡты үҫтереү өсөн беренсе тапҡыр 1 миллиард һум самаһы аҡса бүленде. Быйыл уларҙы финанслау элекке кимәлдә һаҡлана», — тип билдәләне Башҡортостан Ауыл хужалығы министрлығының матбуғат секретары Алмаз Ғәлимов.
Дөйөм алғанда, 2019 йылда республикала 108 ауыл хужалығы ҡулланыусылар кооперативы, 129 фермер хужалығы ойошторолдо. Уларҙың ярҙамы менән ауылда 620 эш урыны булдырылды.
Бынан тыш, республиканың 33 фермер хужалығы һәм кооперативы техникаһын яңыртты һәм ҡорамалдар һатып алды.
«Башҡортостан 2018-2019 йылдарҙа ойошторолған ауыл хужалығы кооперативтары һаны буйынса төбәктәр рейтингында беренсе урынды биләй, — тине Алмаз Ғәлимов. — Ошо ваҡыт эсендә Рәсәйҙә булдырылған яңы кооперативтарҙың 16 проценты — Башҡортостан берләшмәләре».
Шулай уҡ «Ауыл биләмәләренең тотороҡло үҫеше» дәүләт программаһы сиктәрендә былтыр ауыл инфраструктураһын үҫтереүгә 1,2 миллиард һум аҡса бүленгән, шул иҫәптән 692, 8 миллион һумы федераль бюджеттан. Ауылда йәшәгән 840-лап ғаилә торлаҡ шарттарын яҡшыртыуға субсидия алған. Бының өсөн 816 миллион һум бүленгән.
Ә 2020-2022 йылдарҙа башҡорт ауылдары инфраструктураларын үҫтереүгә 4,7 миллиард һум, шул иҫәптән 3,026 миллиард һум федераль бюджеттан йүнәлтеләсәк. Был аҡсаға 24-әр газ һәм һыу менән тәьмин итеү объекттары, 8 фельдшер-акушерлыҡ пункттары төҙөләсәк, шулай уҡ 11 торлаҡ төҙөлөшө һәм 5 комплекслы ауыл биләмәләре үҫеше проекттары тормошҡа ашырыласаҡ.
Читайте нас:
