+11 °С
Болотло
Бөтә яңылыҡтар
Редакция почтаһынан
4 Октябрь 2019, 19:57
Бесәй тураһында әкиәт
Бесәй тураһында әкиәтӘүәл бик борон заманда,Бер алыҫ ҡара урманда,Әбей менән бабай икәүҒүмер итеп ятҡандар, ти.Барына ҡәнәғәт булып,Татыу тормош көткәндәр, ти.Һәр тыуған көнгә шатланыпБергә шөкөр иткәндәр,ти.
Бабай кейек-януарҙарҙы
Балаһылай яҡын күргән.
Уларҙы яҡлап-ҡурсалап,
Һәр көн урманда йөрөгән.
Бер саҡ алыҫ сәфәренән
Төйәгенә ҡайтып килгән.
Һәм бығаса һис белмәгән
Кескәй бер йәнлекте күргән.
Ҡуянға ла оҡшамаған,
Бабай күргән тейен түгел.
Йомро ғына, йомшаҡ ҡына,
Бик һөйкөмлө икән үҙе.
Бабай уға яҡын килеп,
Ҡулына алмаҡсы иткән.
Шунда йәнлек хәлһеҙ генә
“Мыяу” тигән тауыш биргән.
Йәнлекте бик һаҡлыҡ менән
Бабай ҡуйынына алған.
Мәрхәмәтле ҡулды тойоп,
Мыяуҡай ҙа тынып ҡалған.
Көтөлмәгән был табышҡа
Әбей бигерәк ҡыуанған.
Өйҙө йәмләп йөрөй тиеп,
Йәнлеккә ҡарап йыуанған.
Биҙәкле туҫтаҡҡа һалып,
Һәр көн йылы һөт эсергән.
Йомшаҡ түшәктәр түшәгән,
Майлы ит өлөшө биргән.
Әбей: “Эс!эс!” – тип әйткәнде,
Бабай: “Бес,бес”, – тип
ишеткән.
“Бесәй” тигән наҙлы исем
Йәнлеккә лә оҡшап киткән.
Шунан башлап иркә бесәй
Өйҙә көн итә башлаған,
Аслы-туҡлы йөрөүҙәрен
Иҫенән юйып ташлаған.
Әбей уны бик яратҡан,
Һис кенә лә эш ҡушмаған.
Мәшәҡәтһеҙ, рәхәт йәшәү
Бесәйгә лә бик оҡшаған.
Көн буйына мыр-мыр йоҡлай,
Торһа, йылы ҡаймаҡ көтә.
Унан һуң көҙгө янында
Әйләнгеләп, арып бөтә.
Иҫәпһеҙ күп күлдәктәре –
Береһен ала, береһен һала.
Ҡатлап кейеп ҡарай ҙа бит –
Иң матуры аҫта ҡала.
Аллы-гөллө биҙәктәре,
Ҡараһаң, күҙҙәр ҡамаша.
Ҡарай-ҡарай туя алмай:
Ниндәй һоҡланғыс тамаша!
Көн артынан көндәр үтте,
Һалҡын елле көҙҙәр етте.
Мыяубикә матур ғына
Бесәй булып үҫеп китте.
Әбей менән бабай ғына
Бик йыш зарлана башланы:
“Сысҡан тигән ян(ы)уарҙар
Килеп тулған өй башына”…
Бесәйҙең һис иҫе китмәй –
Килһәләр, китерҙәр әле.
Бер-нисәһен күрҙе инде –
Һис тә ҡурҡыныс түгелдәр.
Ғәҙәтенсә, бер көн шулай,
Күлдәктәрен алмаҡ булды,
Биҙәнеп, көҙгөгә ҡарап,
Үҙенә һоҡланмаҡ булды.
Теҙеп элгән күлдәктәрен
Күргәс, саҡ ауып китмәне.
Тетелеп-йолҡоноп бөткән,
Ҡалмаған һис бер имене.
Бер күлдәге кеҫәһенән
Йылтыр күҙле баш күренде.
Шунда ғына сысҡандарҙың
Эше икәнен төшөндө.
Асыуына түҙә алмай,
Бесәй сысҡанға ташланды.
Тотмаҡ булып, йән фарманға
Уны баҫтыра башланы…
Ошо көндән сысҡан халҡы –
Бесәйҙәргә яуыз дошман.
Өләсәйҙен васыяты
Уларға бит шулай ҡушҡан.
Светлана ТИМЕРҒӘЛИЕВА.
Читайте нас:
© 1990 - 2024 «Ашҡаҙар» гәзите.
Бөтә хоҡуҡтар ҙа яҡланған.
Мәҡәләләрҙе күсереп баҫҡанда, йә уларҙы өлөшләтә файҙаланғанда «Ашҡаҙар» гәзитенә һылтанма яһау мотлаҡ.
Зарегистрировано Федеральной службой по надзору в сфере связи, информационных технологий и массовых коммуникаций (РОСКОМНАДЗОР). Регистрационный номер: серия ПИ №ТУ02-01679 от 22 июля 2019 г.
Баш мөхәррир
Мансуров Рәмил Ғәбдрәшит улы.
Телефон
Баш мөхәррир (347) 325-18-57 Яуаплы сәркәтип (347) 325-18-57 Хәбәрселәр (347) 325-75-70 Бухгалтерия (347) 325-60-73
Электрон почта
Адресы
453124, РБ, г. Стерлитамак, ул. Комсомольская, 82
Реклама хеҙмәте
(347) 325-18-57
Редакция
(347) 325-18-57
Ҡабул итеү бүлмәһе
(347) 325-18-57
Хеҙмәттәшлек
(347) 325-18-57