Үҙебеҙҙең һөттө генә эсербеҙ

«Был проект беҙгә һөт продукттарын етештереүҙе икеләтә арттырырға һәм уның күләмен 1,5 миллион тоннаға еткерергә, һөттөң тауарлыҡ кимәлен 95 процентҡа тәьмин итергә, һыйырҙарҙан йылына уртаса 7400 килограмм, ә ауыл хужалығы ойошмаларында 9000 килограмға тиклем һөт һауырға форсат бирәсәк», – тип билдәләгән БР ауыл хужалығы министры Илшат Фазрахманов. Уның һүҙҙәренсә, һөт етештереүселәр аҙая бара, сөнки улар – күп, ныҡлы үҫешер өсөн үҙҙәренең финанс, кадрҙар мөмкинлеге юҡ кимәлдә. Шуға һөт баҙарында башлыса эре хужалыҡтар ҡала бара һәм көсһөҙҙәр ҙурҙары иҫәбенә бөлөүҙән һаҡланасаҡ.

Программа бер нисә этапта баш-ҡарыласаҡ. Беренсеһендә мал иҫәбе контролгә алынасаҡ, ауыл хужалығы инфраструктураһы заман талаптарына яраҡлаштырылып яңыртыласаҡ. Икенсе этап 20-25-ләп юғары технологиялы индустриаль ферма төҙөү һәм һөт эшкәртеүҙе модернизациялауҙы күҙ уңында тота. Өсөнсө этапта юғары һөҙөмтә бирерлек һәүкәшкәйҙәр арттырыласаҡ, тоҡом малы дөйөм һыйырҙарҙың 70 процентын тәш-кил итәсәк. Был ауыл хужалығы ойошмаларының килемен арттырыуға булышлыҡ итәсәк.

Бөгөн беҙҙә йылына 715 мең тонна һөт етештерелә, ә инвестициялар индерелгән хәлдә күрһәткестәр миллиондан ашып китәсәк һәм, иң мөһиме, ситтән һөт килтерелмәйәсәк, һөт продукцияһы хатта сит төбәктәргә лә сығарыласаҡ.