Йылдар ауазы

Стәрлетамаҡ тарихындағы мөһим ваҡиғаларСтәрлетамаҡ – Башҡортостандың иң матур, төҙөк һәм таҙа ҡалаларының береһе. Оҙаҡ йылдар ҙур химия гиганттары менән дан алған ҡалабыҙҙа бөгөн 280 меңдән ашыу кеше йәшәй. Төҙөклөгө һәм уңайлылығы менән генә түгел, йәмле тәбиғәте менән дә дан тотҡан Стәрлетамаҡты береһенән-береһе хозур, мәғрур шихандар ҡурсалап торһа, көн тимәй, төн тимәй, йырлай-йырлай ағып ятҡан һылыу Ағиҙел, Стәрле, Ашҡаҙар, Ольховка йылғалары дәүерҙәрҙән-дәүерҙәргә күсә килгән йылдар ауазын бәйән итә төҫлө. Стәрлетамаҡ үҙенең халҡының ябайлығы, мәҙәнилеге менән дә башҡа ҡалаларҙан айырылып тора. Уның үҙенә генә хас йөҙө, йәшәйеше бар. Ҡалабыҙ, өлкәнәйгән һайын, ай үҫәһен көн үҫеп, олпатлана, шул уҡ ваҡытта йәшәрә бара. Уның менән бергә беҙ ҙә олпатланабыҙ, оло быуынға алмашҡа көслө рухлы, киләсәккә ҙур маҡсаттар ҡуйған йәш быуын үҫә. Башҡортостан Республикаһы үҙенең йөҙ йыллыҡ юбилейын билдәләгән мәлдә Стәрлетамаҡтың бер быуатлыҡ тарихына ҡыҫҡаса ғына булһа ла байҡау яһарға булдыҡ. Илдә, республикала барған ваҡиғалар шауҡымы Стәрлетамаҡты ла урап үтмәгән – шанлы-данлы йылдарҙа ҡалабыҙ бирешмәгән, киреһенсә, сыныҡҡан һәм үҫешкән генә. Уның тарихында шатлыҡлы ла, хәсрәтле лә ваҡиғалар күп булған, әммә ошо матур иҫтәлекле юбилей уңайынан, тарих биттәренең тик яҡты яҡтарына ғына ҡараш ташларға булдыҡ. Йөҙ йыл эсендә Стәрлетамаҡты бик күп етәкселәр етәкләгән. Шулар араһында иң оҙаҡ эшләгән һәм тарихта яҡты эҙ ҡалдырған иң билдәлеләре – Елена Щебланова (1965-1985 йылдар); Спартак Әхмәтов (1992-2007 йылдар). Улар етәкләгән осор ҡаланың гөрләп сәскә атҡан һәм үҫеш йылдары булып тарихта ҡалды.