Таҙа һыу, швед өҫтәле һәм ихаталар

БР Торлаҡ-коммуналь хужалығы министры ҡалала ҡалдыҡтарҙы эшкәртеү, таҙа һыу, капиталь ремонт яһалған подъездар, спорт ҡоролмалары, айырып әйткәндә, көрәште үҫтереү, мәктәп ашханаһы, балаларға тәҡдим ителгән аҙыҡтың сифаты һәм был өлкәлә системаны яҡшыртыуға бәйле мәсьәләләрҙе ҡараны.
Министрҙы ҡаланың мөһим объекттары буйлап ҡала хакимиәте башлығы урынбаҫарҙары Андрей Ермолаев һәм Илдар Ғарифуллин, торлаҡ-коммуналь хужалыҡ идаралығы начальнигы Борис Шахтарин оҙатып йөрөнө. Борис Беляевтың эш сәфәре «Махит-стр» ҡалдыҡтарҙы айырыу комплексынан башланып китте. Комплекстың директоры Әмир Йәғәфәров бында махсус майҙан-дарҙың, полигондың, кәрәкле техника һәм йыһаздың ҡалдыҡтарҙы эшкәртә алыу ҡеүәте менән таныштырып үтте.

Стәрлетамаҡта грек-рим көрәше популярлаша, уның менән шөғөлләнеүселәр арта, шул уҡ ваҡытта Борис Беляев республикабыҙҙа тап ошо спорт төрө буйынса куратор булып тора. Был йәһәттән ул олимпия резервындағы спорт мәктәбен һәм 5-се мәктәпте лә ситтә ҡалдырманы, ундағы спорт залдарына инеп, унда шөғөлләнгән егет-ҡыҙҙар, тренерҙары менән аралашты. Һөйләшеү барышында шуныһы билдәле булды: министр киләсәктә был спорт төрө буйынса олимпия чемпиондары үҫте-реп сығарырға үҙенә маҡсат ҡуйған.

Мәктәптә туҡланыуға ла иғтибар ҙур, хатта был һорау ил кимәлендә лә хәл ителгәнен онотмайыҡ. Борис Владимирович иһә 5-се мәктәптә «швед өҫтәле» системаһы буйынса ҡоролған туҡланыу менән танышып сыҡты. Шулай уҡ бындағы буфетта “уҡыусы картаһы” менән түләү системаһын ентекләп өйрәнде.
Ҡунаҡтар республика һәм федераль программалар буйынса ремонтланған объекттарҙа – Цюрупа урамындағы 30-сы һәм 32-се йорттарҙа булды.

Министр иһә ҡарҙан һәм боҙлауыҡтан яҡшы итеп таҙартылған ихаталарға иғтибар бирҙе һәм ҡайһы бер фатирҙарҙың тәҙрәләре асыҡ булыуын билдәләп үтте. Был һорау менән ул капиталь ремонт яһалған подъездарға инеп ҡараған ваҡытта, фатир хужаларына мөрәжәғәт итеп, йылылыҡ өсөн түләү ҡағыҙҙарын һорап алып тикшереп сыҡты. Ишектәрҙең береһен Бәишева Миләүшә инәй асты һәм барыһы менән дә ҡәнәғәт булыуҙары тураһында һөйләп үтте:
– Әле әкиәттәге кеүек йәшәйбеҙ, йортобоҙҙа һәр ваҡыт йылы, ихатабыҙ ҡарҙан таҙартылған, коммуналь хеҙмәт буйынса түләү ҙә ҙур түгел, киреһенсә, был айҙа йылылыҡҡа түләү кәмеп килде. Бында улым ғаиләһе менән йәшәй, ул да бик ҡәнәғәт, – тине Миләүшә Лотфулла ҡыҙы.
Курчатов урамындағы 2,6,8-се йорттарға ла туҡталдыҡ, бында ла «Башҡорт ихаталары» программаһы буйынса төҙөкләндереү эштәре башҡарылған. Был йорттарҙы хеҙмәтләндергән идара итеүсе компаниялар ҙа үҙ эшен ваҡытында башҡарырға тырыша, ихаталарҙы һәм майҙансыҡтарҙы ҡарҙан һәм боҙҙан таҙартып тора.

Эсәр һыуҙың таҙа булыуы ла көнүҙәк мәсьәлә. Белеүегеҙсә, ҡаланы һыу менән район-ара һыу каналы тәьмин итә. Был мөһим объектты ла ҡарап сыҡтыҡ. Лабораторияға инеп, һыуҙың сифатын тикшереү процесы менән таныштыҡ. Әйткәндәй, был эш көн дә башҡарылып тора һәм һөҙөмтәләре махсус журналға теркәлә бара. Предприятиеның директоры Александр Пантелеев һыуҙы таҙартыусы заманса ҡорамалдар менән таныштырҙы. Махсус йыһаз яҙ айҙарында крандарыбыҙҙан аҡҡан болғансыҡ һыуҙы бөтөрөргә ярҙам итергә тейеш. «Таҙа һыу» милли проектын ҡалабыҙҙа 2020-2021 йыл-дарҙа бойомға ашырырға ниәтләйҙәр.

Ысынлап та, ҡалабыҙ бик күп проекттарҙа, программаларҙа ҡатнаша, ә “Ҡала мөхитен формалаштырыу” проекты киң масштабта үтә. Был программа ярҙамында “Сода” паркы яңы төҫ алды. Бында эскәмйәләр, яҡтыртыу ҡорамалдары, сәхнә, видео күҙәтеү ҡуйылған, балалар өсөн уйын ҡаласыҡтары төҙөлгән, велосипед юлдары һалынған. Андрей Ермолаев балалар майҙансығына һәм асфальт һалыуға бәйле етешһеҙлектәр барлығы тураһында әйтеп үтте һәм был мәсьәлә яҙ айҙарында, яҡшы һауа шарттарында подрядсы тарафынан еренә еткерелеп ҡуясағын белдерҙе.

Ҡарап үткән объекттар буйынса аралашыу ҡала хакимиәтендә үткән кәңәшмә барышында дауам итте. Һөйләшеү барышында 2019 йылда милли проекттарҙы ғәмәлгә ашырыу һөҙөмтәләре һәм 2020 йылға пландар, 2019-2020 йылда йылытыу айҙары барышын һәм ҡаты ҡалдыҡтар әйләнешенең яңы системаһы эшмәкәрлеген ҡарап үттеләр.

Эльдар Фәттәхов фотоһы.