+20 °С
Болотло
Республика һулышы
24 Май 2021, 06:37
Балаларға энергетиктар һатҡан өсөн штраф тураһында закон көсөнә инде
Башҡортостанда балаларға энергетиктар һатҡан өсөн штраф һалыу тураһында закон көсөнә инде. Документ бәлиғ булмағандарға, шулай уҡ белем биреү һәм медицина ойошмаларында, физкультура-һауыҡтырыу учреждениеларында, спорт ҡоролмаларында, балаларҙы ял иттереү һәм һауыҡтырыу ойошмаларында алкоголһеҙ тонусты күтәреү эсемлектәрен һатыуҙы тыйыуҙы күҙ уңында тота.
Сикләүҙәр уҙған йылда уҡ булдырылды, бына хәҙер уларҙы үтәмәгән өсөн штраф индерелде, тип хәбәр итте республика парламентының матбуғат хеҙмәте.
Граждандарға – 3 000-4 000 һум; вазифалы кешеләргә – 30 000-40 000 һум; юридик шәхестәргә – 150 000-200 000 һум. Законды ҡабаттан боҙған өсөн штраф түбәндәгесә: граждандарға – дүрт меңдән биш мең һумға тиклем; вазифалы кешеләргә – ҡырҡ меңдән илле мең һумғаса; юридик шәхестәргә – ике йөҙ меңдән ике йөҙ илле мең һумға тиклем.
Энергетиктарҙы һатыуҙы сикләү уның балалар организмына кире тәьҫир итеүе менән бәйле.
«Аҙ миҡдарҙағы энергетиктарҙың зыяны юҡ, ләкин төп проблема шунда: ошондай файҙаһыҙ эсемлектәрҙе яратыусылар – һаулыҡ тураһында бик аҙ уйланған үҫмерҙәр, – тип билдәләй парламент спикеры Константин Толкачев. – Магазинда матур алюмин банкаларҙағы энергетиктар һалҡынайтҡыс эсемлектәр эргәһендә тора һәм бер кемде лә һағайтмай. Әгәр бала бер туҡтауһыҙ энергетиктар ҡулланһа, уның сәләмәтлегенә зыян килеүе ихтимал».
Башинформ.
