Өфөлә 12 июндә һыу һәм һауа транспорты парады уҙа

Республика етәксеһе, байрамдарҙы ойошторғанда Ағиҙел яры буйын һөҙөмтәле итеп ҡулланыу бурысын да ҡуйҙы. Беҙ әле был объекттың әһәмиәтен аңлап бөтмәйбеҙ, бик матур урын, бары тик йән өрөү мөһим, тине Радий Фәрит улы.

Башҡортостан башлығы төбәктә социаль-иҡтисади күрһәткестәрҙең нормаға ҡайтыуын да билдәләне. Ҡайһы бер тармаҡтар ҙа алға китеш тә күҙәтелә. Тулыраҡ БЮТ каналы хәбәрсеһе Рәмзиә Кәримова репортажы.

Инвестиция климатының торошо буйынса милли рейтингта бишенсе урын. Санкт-Петербург иҡтисади форумында иғлан ителгән мәғлүмәтте һуңғы көндәрҙең төп яңылығы тип әйтергә мөмкин. Бөгөнгө оператив кәңәшмә лә ошо хаҡта фекер алышыуҙан башланды. Юғары ҡаҙаныш төбәккә оло яуапллыҡ та өҫтәй, яңы маҡсаттар ҙа ҡуя, тине Радий Хәбиров.

Тотороҡло социаль-иҡтисади күрһәткестәр мәкерле сирҙең сигенеүен, тормоштоң үҙ ярына ҡайтыуын иҫбатлай. Әммә коллектив иммунитет булдырмайынса ауырыуҙан тулыһынса ҡотолоп булмаясаҡ. Әле республикала коронавирустан 295 мең кеше вакцина яһатҡан. Прививканы «Сәләмәт республика-сәләмәт төбәк» акцияһы сиктәрендә лә һалдырырға мөмкин. Статистика мәғлүмәттәре һуңғы тәүлектә сирҙе 95 кешенең йоҡтороуын күрһәтә.

Коронавирус менән бәйле хәлдең тотороҡланыуы республикала күләмле сараларҙы уҙғарыу мөмкинлеге бирә. Әле төбәктәрҙә һабантуйҙар бара. Алда ҡала һәм Рәсәй көнөнә арналған тантаналар. 12 июнгә Өфө халҡы һәм ҡунаҡтары өсөн бай йөкмәткеле программа әҙерләнгән, һауа һәм һыу транспорты парады уҙғарыу күҙаллана. Республика башлығы Ағиҙел яры буйында төрлө саралар ойоштороу, майҙанға йән өрөү бурысын ҡуйҙы.

Радий Хәбиров фекеренсә, Ағиҙел буйы Өфөнөң иң күркәм урындарының береһе буласаҡ, әммә әлегә инфраструктура етмәй. Шуға ҡарамаҫтан, көн һайын йылға буйы меңләп кешене йәлеп итә. Ял, байрам көндәрендә был һан 4 тапҡырға арта.

Оператив кәңәшмәлә «Йәшел Башҡортостан» акцияһы, подъездарҙы, ихаталарҙы ремонтлау хаҡында ла һүҙ барҙы. Радий Хәбиров ерекмәгән йәки ҡороған ағастар урынына яңыларын ултыртыу бурысын ҡуйҙы. Ә бына төҙөкләндереү эштәренә килгәндә, обьекттарҙы тикшереп ҡабул итеү мотлаҡ. Намыҫһыҙ подрядсылар етешһеҙлектәрҙе үҙ иҫәбенә төҙәтергә тейеш, тине Республика башлығы, тип хәбәр итә Баш ньюс.