+24 °С
Болотло
Республика һулышы
28 Ғинуар 2022, 06:29
Бөгөнгә республикала 103 резидент бар
Башҡортостан — йылдам социаль-иҡтисади үҫеш биләмәһе резиденттары һаны буйынса Рәсәй төбәктәре араһында лидер
Бөгөнгә республикала 103 резидент бар
Башҡортостан йылдам социаль-иҡтисади үҫеш биләмәләре резиденттары һаны буйынса — Рәсәй төбәктәре араһында лидер, тип белдерҙе республика Башлығы Радий Хәбиров.
Бөгөнгә республикала 103 резидент бар.
«Беҙгә Рәсәйҙең һәм сит илдәрҙең ҙур күләмдәге аҡса һалырға, инвестиция проекттарын тормошҡа ашырырға әҙер булған компаниялары әүҙем килә. Компанияларыбыҙҙың ышанысы арта», — ти республика етәксеһе.
2021 йыл йомғаҡтары буйынса Рәсәйҙең Иҡтисади үҫеш министрлығында Башҡортостандан 35 резидент теркәлгән, был 2020 йылға ҡарағанда 25% күберәк. Йылдам социаль-иҡтисади үҫеш биләмәһе резиденттары Башҡортостан иҡтисадына 5,4 миллиард һум инвестиция һалған, 3,6 мең кеше эшкә урынлаштырылған. Йылдам социаль-иҡтисади үҫеш биләмәһенә инвестиция проекттарын тормошҡа ашырыу барышында бөтәһе 52 миллиард һумдан ашыу инвестиция йәлеп итеү һәм 8 мең самаһы эш урыны булдырыу күҙаллана.
Хәтерегеҙгә төшөрәбеҙ, республиканың Күмертау, Благовещен, Нефтекама, Белорет һәм Бәләбәй ҡалаларында йылдам социаль-иҡтисади үҫеш биләмәләре эшләй.
Йылдам социаль-иҡтисади үҫеш биләмәһе резиденттары предприятиелары өсөн табышҡа һалым буйынса льготалар ғәмәлдә. Федераль өлөш тулыһынса бөтөрөлә, республика өлөшө тәүге биш йылда — 5%, артабанғы биш йылда 10% була. Файҙалы ҡаҙылмалар сығарыуға һалымды ҡулланғанда түбән коэффициент ғәмәлдә. Шулай уҡ йылдам социаль-иҡтисади үҫеш биләмәһе булдырылғандан алып тәүге өс йылда ошондай статус алған резиденттар өсөн страховка взностары буйынса тарифтар ҙа кәметелде (30% алып 7,6% тиклем). Төбәк кимәлендә йылдам социаль-иҡтисади үҫеш биләмәһе резиденттары — милек, ә муниципаль кимәлдә ер һалымынан азат ителде.
Башҡортостанда йылдам социаль-иҡтисади үҫеш биләмәһе тураһында тулыраҡ мәғлүмәтте ошо һылтанма буйынса алырға мөмкин.
Башинформ.
