Шағирәнең бөтә тормошо, ижады күҙ алдына баҫты һәм йәш быуында ҙур ҡыҙыҡһындырыу уятты. Ошондай уҡ байрам сараһы ҡалабыҙҙың иң күркәм ғаиләләләре Туйгильдиндар һәм Артиковтар ҡатнашлығында Абдулҡадир Инан исемендәге китапханала ла ойошторолдо. Сараның әҙәби кафе өлөшөнә Өфө ҡалаһынан мәртәбәле ҡунаҡтар – Башҡортостандың атҡаҙанған мәҙәниәт хеҙмәткәре, «Аҡбуҙат» журналының баш мөхәррире, Башҡортостан хөкүмәтенең Шәһит Хоҙайбирҙин һәм Шәйехзада Бабич исемендәге премиялар лауреаты, күренекле шағирә Лариса Абдуллина, шулай уҡ ошо уҡ баҫмала эшләүсе йәш шағирә, журналист Айгөл Ғәбитова килгәйне. Ә инде күренекле шағирә, «Башҡортостан ҡыҙы» журналының баш мөхәррире, Шәйехзада Бабич исемендәге премия лауреаты Гөлназ Ҡотоеваның да сараға килеп етеүе байрамда ҡатнашыусылар өсөн айырыуса көтөлмәгән бүләк булды. Шулай уҡ Күмертау ҡалаһында йәшәп ижад итеүсе йәш шағирә Гөлназ Искәндәрованың сығышы ла сараға дәрт-дарман өҫтәне.
Етегән байрамы хаҡында гәзитебеҙҙең киләһе һандарында тулыраҡ уҡырһығыҙ.
Римма ҒӘЛИМОВА.
Эльдар ФӘТТӘХОВ фотоһы.