+30 °С
Болотло
Сәләмәтлек
30 Март 2021, 12:00
Өфө дәүләт нефть техник университеты студенты Ф-1 инвалид креслоһының прототибын төҙөгән
Өфө дәүләт нефть техник университеты студенты Мехроб Назаров уникаль инвалид креслоһының Ф-1 тип аталған прототибын йыя. Еңел конструкция сәләмәтлеге буйынса мөмкинлектәре сикләнгән кешеләргә әүҙем тормош алып барырға һәм тигеҙ булмаған юлда ла йөрөү мөмкинлеген бирә.
2015 йылға тиклем Мехроб Назаров профессиональ көрәш спорты менән шөғөлләнә,әммә ярыш барышында уңайһыҙ йығылғандан һуң, муйын умыртҡаһының һөйәге һына. Тап ошо осраҡтан һуң уның тормошо үҙен яңынан әүҙем томошҡа ҡайтарыу өсөн көрәшкә әүерелә. Әлегә егеткә инвалид коляскаһы ярҙамында хәрәкәтләнергә тура килә. Уңайлы булһын өсөн үҙ көсө менән функциональ коляска конструкциялай.
Өс йыл элек ҙур һәм уңайһыҙ коляскала йөрөй инем. Шунан һуң бына ошо колясканы бирҙеләр. Ә 2018-ҙә мин уны етештереүсе менән ҡыҙыҡһына башланым. Әлеге ваҡытта беҙ баҙарға тәҡдим иткән кеүек уңайлы коляскалар башҡа бер кемдә лә юҡ .
Мехроб Назаров, Өфө дәүләт нефть техник университеты студенты
Дюралюминийҙан ортопедик креслолы колясканы һәр кемдең кәүҙәһенә ҡарап яйларға мөмкин. Хатта ҡул кимәленә ҡарап, бейеклекте көйләй алаһың. Транспортировкалағанда ла тиҙ генә йыйыла. Ауырлығы ни бары 11килограмм тәшкил итә. Таныш конструкторҙары Мехробҡа һыҙмалар әҙерләргә ярҙам иткән.
Коляскаларҙы тәүгә ҡорам. Башлыса кран-манипуляторҙар менән шөғөлләндем, был минең өсөн яңы өлкә. Мехроб та идеялар бирҙе. Һыҙмаларға һәм проектты тормошҡа ашырыуға ике айҙан ашыу ваҡыт сарыф иттем.
Игорь Романов, «F-1» коляскаһының инженер-конструкторы
Конкуренттар ҡуллана алмаһын өсөн БЮТ хәбәрселәренә һыҙмаларҙы яҡындан төшөрмәҫкә тәҡдим иттеләр. Ф-1 коляскаһы баҙарҙа ысын мәғәнәһендә ғорурлыҡ тойғолары уятырға тейеш, ти уны уйлап табыусылар. Әлегә дөйөм хаҡы тулыһынса иҫәпләнмәгән, ә европа аналогтары 200-300 мең һум самаһы. Тест экземплярына студенттар үҙ көсө менән аҡса йыйған.
Яҡын арала был заявканы, ҡорамалдар, материалдар һатып алыуҙа ярҙам итеү өсөн Өфө дәүләт нефть техник университетының лидерҙар инициативаһы төркөмө конкурсы аша рәсмиләштерәсәкбеҙ. Бағыусылар эҙләйәсәкбеҙ, был маҡсатта үҙебеҙҙә уҡып сыҡҡан белгестәрҙе йәлеп итәсәкәбеҙ. Колясканың прототибы әҙер булыу менән, беҙ уны мөмкин тиклем тиҙерәк етештерә башларға ниәтләйбеҙ.
Олег Баулин, Өфө дәүләт нефть техник университеты ректоры
Техник юғары уҡыу йорто студенттарына Ишембай машина төҙөү заводы ла ярҙам ҡулы һуҙа. Беренсе өлгө тап ошо завод майҙанында йыйыласаҡ та инде. Мехроб та ауыр йәрәхәттәр алыуында бер кемде лә ғәйепләмәй. Тап ошо күңелһеҙ осраҡ уға инвалид креслоһының бар уңайһыҙлыҡтарын үҙ иңдәрендә татырға һәм мөмкинлектәре сикләнгәндәр өсөн ғүмере буйы хыялланған уңайлыҡтар булдырырға этәргес биргән.
Гүзәл Борханова.
https://bash.news
