+21 °С
Облачно
Сәнғәт һәм мәҙәниәт
23 Июля 2020, 16:23
Башҡортостан 2021 йылда Бөтә донъя фольклориадаһын үткәрергә әҙерләнә
Башҡортостан Республикаһы Хөкүмәте Премьер-министрының беренсе урынбаҫары Андрей Назаров 2021 йылда VI Бөтә донъя фольклориадаһын уҙғарыу мәсьәләләре буйынса эш кәңәшмәһе үткәрҙе.Билдәле булыуынса, 2020 йылда июлдең икенсе яртыһында Башҡортостанда VI Бөтә донъя фольклориадаһы үтергә тейеш ине, ләкин, башҡа бик күп күләмле саралар кеүек үк, пандемия арҡаһында 2021 йылға күсерелде.
Фольклор һәм традицион сәнғәт фестивалдәрен ойоштороу буйынса халыҡ-ара совет менән килешеп, Фольклориаданы киләһе йылдың июлендә уҙғарыу тураһында ҡарар ҡабул ителде.
Башҡортостан Республикаһының мәҙәниәт министры Әминә Шафиҡава килтергән мәғлүмәттәр буйынса, унда 80 илдән коллективтарҙың ҡатнашыуы көтөлә. 2020 йылдың 15 июленә 57 ил теркәлгән. Өфөгә Бөтә донъя фольклориадаһына бөтәһе 2500-гә яҡын кешенең килеүе көтөлә.
Республиканың 34 ҡала-районын үҙ эсенә алған ете фестиваль округы билдәләнгән. Фольклориаданың күсмә өлөшө ошо биләмәләрҙә үтергә тейеш. Андрей Назаров әйтеүенсә, әҙерлек буйынса төп саралар үткәрелһә лә, ҡалған ваҡытты мөмкин тиклем һөҙөмтәле ҡулланыу мөһим.
«Республикаға бик күп ҡунаҡтар килә һәм уны яҡшы яҡтан күрһәтергә кәрәк. Ә беҙҙең күрһәтерлек нәмәләр бар. Башҡортостанда Фольклориада-2021 иң юғары кимәлдә үтһен өсөн хәҙер бөтәбеҙгә лә берләшеү зарур», — тине беренсе вице-премьер.
