+24 °С
Облачно
Сәнғәт һәм мәҙәниәт
10 Марта 2021, 06:00
Аҡыл һынауы киләсәкте һынаны
Һуңғы йылдарҙа халҡыбыҙҙы ҡыуандырып ҡалабыҙҙа бик һәләтле, матур йәш быуын үҫеп килә, егәрле, татыу, һөйкөмлө ғаиләләр ҡорола. Балаларҙың, йәштәрҙең илдә, республика һәм төрлө төбәк буйынса барған спорт, мәҙәни, ижади ярыштарҙа еңеүе, төрлө өлкәлә мәртәбәле конкурстарҙа урын яулауы, фән өлкәһендә маҡтаулы исемдәргә лайыҡлы булыуы шуны дәлилләй. Быға аптырарға түгел, сөнки киләсәк - йәштәр ҡулында! Стәрлетамаҡ ҡалаһында иһә ошо өмөтлө йәштәребеҙ араһында үткәрелгән интеллектуаль уйындар уларҙың аҡыл, зиһен кимәленең ни тиклем юғары булыуын тағы ла бер тапҡыр раҫланы.
Февраль аҙағында Ҡала мәҙәниәт һарайында интеллектуаль уйындар буйынса турнир финалы үтте. Уны Үҙәкләштерелгән китапханалар системаһы ойошторҙо, сара БР Башлығы Гранты нигеҙендә тормошҡа ашырылған “Интеллект лабораторияһы” проекты сиктәрендә уҙғарылды.
“Нимә? Ҡайҙа? Ҡасан?” классик телевизион форматтағы финал уйындарында иң яҡшы мәктәп (12-се лицей), урта махсус уҡыу йорто (Өфө туҡланыу һәм сервис индустрияһы колледжы) һәм юғары уҡыу йорто (БашДУ), шулай уҡ эшсе йәштәр командалары ҡатнашты. Иң ҡыҙыҡлы һорауҙарҙы ҡалабыҙ китапханаларында иң әүҙем китап уҡыусылар бирҙе.
– Ҙур интеллектуаль турнирҙа барлығы 72 команда (400 бала һәм өлкәндәр) ҡатнашты, ҡатмарлылыҡ кимәле турҙан-турға юғарыраҡ булды. Сифатлы әҙерлек өсөн ойоштороусылар күнекмәләрҙе төрләндерҙе, интерактив экскурсиялар һәм видео-консультациялар тәҡдим итте. Ошондай проекттар арҡаһында интеллектуаль уйындар йыш уҙғарыла башланы. Был юлы ул ҡалабыҙҙа депутат Әлфиә Әсфәндиәрова башланғысы менән үткәрелде, – тине ҡала хакимиәте мәҙәниәт бүлеге начальнигы Зөфәр Зиннәтуллин.
Был аҡыл һынауына ҡоролған уйында ҡатнашыусыларҙың барыһын да сәхнәгә сығарып тәбрик иттеләр. Тик бындай уйындарҙа еңеүсе берәү була. Был юлы иһә уңыш «Антрацит» командаһына йылмайҙы. Команданың геройҙары Азат Тимерйәнов, Рафаэль Вәлиев, Радмир Ниғмәтйәнов, Владислав Пестряев, Вячеслав Наумов, Виктор Орлов һәм Павел Хомутниковты тамашасылар һәм ҡаршы командалар оҙаҡ иҫләр әле…
Римма ҒӘЛИМОВА.
Эльдар ФӘТТӘХОВ фотоһы.
