Бөтә яңылыҡтар
Социаль яҡлау
10 Ғинуар 2019, 15:37

1 ғинуарҙан ауыл халҡы өсөн пенсияның билдәләнгән күләме артты

2019 йылдың 1 ғинуарынан ауыл хужалығында 30 йыл хеҙмәт стажына эйә эшләмәгән пенсионерҙар өсөн страховка пенсияһына билдәләнгән түләү 25% арттырылды.

«Башҡортостанда тейешле стажға эйә булған һәм әлеге ваҡытта эшләмәгән 51 мең ауыл кешеһенә билдәләнгән түләү арттырылды. Ағымдағы йылдың ғинуарынан ауыл халҡына айлыҡ арттырыу 1333 һумдан ашыу тәшкил итә. Бының өсөн бер ниндәй ҙә ғариза яҙыу талап ителмәне, был пенсия (түләү) эше мәғлүмәттәре буйынса башҡарылды», — тип хәбәр итте Пенсия фондының Башҡортостан буйынса бүлексәһе идарасыһы Фоат Хантимеров.
Уның һүҙҙәренсә, ауыл хужалығындағы эш стажын иҫәпләү өсөн Рәсәй Хөкүмәте ҡарары менән раҫланған Эштәр, производстволар, һөнәрҙәр, вазифалар, белгеслектәр исемлеге файҙаланылған.
Ауыл ерендә төп эшмәкәрлеге ауыл хужалығы менән бәйле булмаған ойошмаларҙа һәм учреждениеларҙа (мәктәптә, ауыл советында, фельдшер һәм медицина пунктында) эшләгәндәр өсөн билдәләнгән түләү арттырылмай.
Ауыл хужалығында (үҫемлекселек, малсылыҡ, балыҡсылыҡ) 30 йыл эш стажы хеҙмәт кенәгәһендәге яҙмалар менән раҫланмаған пенсионерҙар пенсияны яңынан иҫәпләтеү өсөн теләгән ваҡытта Пенсия фондына өҫтәмә документтар тапшырырға хоҡуҡлы.
1 ғинуарҙан 31 декабргә тиклем мөрәжәғәт иткән осраҡта пенсия 2019 йылдың башынан тейешле суммаларҙы юғалтыуһыҙ ҡабаттан иҫәпләнә.
2019 йылдың 31 декабренән һуң иһә страховка пенсияһына билдәләнгән түләүҙе яңынан иҫәпләү тураһында ғариза бирелгән айҙан һуң икенсе айҙың 1-енән иҫәпләнә.
http://www.bashinform.ru/news/1259166-s-1-yanvarya-uvelichen-fiksirovannyy-razmer-pensiy-dlya-selchan-opfr-po-bashkirii-/
Читайте нас в