«Би Хеппи» компанияһы ун дүрт урман участкаһын ҡуртымға алыу буйынса аукционда ҡатнашмай

«Санкциялар ҡиммәтле сит ил ҡорамалдарын Рәсәйгә индереүҙе сикләне. Ҡыҙғанысҡа, демократия үҫешкән көнбайыш илдәрендә айырым инвестиция проекттары ғына түгел, хатта кеше хоҡуҡтары нигеҙе һәм эшҡыуарлыҡ алып барыу ирке кеүек төшөнсәләр бөтөнләй демократик булмаған юлдар менән ҡайтанан ҡарала.

Бөгөн Ишембайҙа Маҡар ауыл биләмәһе умартасылары менән инвесторҙың осрашыуы үтергә тейеш ине. Сит ил вәкиле унда ҡатнаша алманы, халыҡ менән Хөкүмәт Премьер- министры урынбаҫары Азат Бадранов аралашты. Ул ҡортсолоҡто үҫтереү йәһәтенән ерле умартасыларға башланғысты үҙ ҡулына алырға тәҡдим итте.

Ишембай умартасылары менән шулай уҡ ауыл һәм урман хужалыҡтары министрлыҡтары, республиканың айырыуса һаҡланған биләмәләр дирекцияһы вәкилдәре лә осрашты. Умартасыларҙың хоҡуҡ һәм мәнфәғәттәрен яҡлау өсөн иң уңайлы ысул, кооперативҡа берләшеү тип билдәләнде фекер алышыуҙа. Әле иң әүҙем ҡортсолар эшсе төркөм ойошторған.

Тимәк, кооператив булдырыуға нигеҙ бар. Умартасылар ҡулланған ер участкаларына кадастр һандарын юллау, кисекмәҫтән хәл итеү талап иткән мәсьәлә. Йәғни, умарталыҡтарҙы рәсмиләштерергә кәрәк. Бал ҡорто ҡараусылар шулай уҡ йүкә урмандарының йылдан-йыл кәмей барыуына борсолоу белдерҙе.

Осрашыуҙа ҡатнашыусылар билдәләүенсә, ер участкаларын умартасылыҡ йүнәлешендә ҡулланыуҙы закон нигендә нығытҡан осраҡта 3 километр радиуста ағас ҡырҡыу тыйыла. Тимәк, йүкә урмандарын һаҡлауға ныҡлы нигеҙ булдырыла.

Баш ньюс.