Ғөмүмән, “БашЭко” компанияһы ағас ҡалдыҡтарын, ботаҡтарҙы, кипкән япраҡтарҙы эшкәртеп, уларҙан башҡа төрлө киң ҡулланыу продукцияһын сығара. Баҡтиһәң, ваҡ ботаҡтарҙы эшкәрткәндән һуң, тупраҡ структураһын яҡшыртыу, дымлылыҡты арттырыу өсөн дә ҡулланырға була икән. Тағы ла ағас ҡалдыҡтарынан яғыу өсөн материал (ваҡ утын тип тә атарға була), төҙөлөш материалдары, хатта мал аҙығы өҫтәмәләренә ингән ылыҫ онон да етештерәләр. “БашЭко” директоры Юрий Барабаш әйтеүенсә, был он витаминдарға бик бай икән, составында С витамины, каротин, мейегә, һөйәктәргә файҙалы булған витаминдары бар. Ауырыған малдарға быны ашатыу бик тә файҙалы, ти ул.
– Тыуған ҡалабыҙҙың таҙараҡ, хәүефһеҙерәк һәм матурыраҡ булыуын теләйбеҙ. Тирә-яҡҡа күҙ һалһаҡ, беҙҙе тәбиғи матурлыҡ уратып алған, әммә уны барыһы ла күреп өйрәнмәгән. Ә беҙ барыһын да күрәбеҙ һәм үҙенең матурлығын юғалтҡан, йә ошо матурлыҡты күрергә ҡамасаулаған әйберҙәрҙе эшкәртеп, уларға икенсе ғүмер бүләк итәбеҙ. “БашЭко” клиенттары йыш ҡына беҙҙән йорт алдын биҙәргә төрлө төҫтәге, махсус итеп эшкәртелгән ағас онтаҡтарын, йәғни юнысҡыларҙы ала, – ти Юрий Викторович.
Әйткәндәй, “БашЭко” яуаплылығы сикләнгән йәмғиәте яңыраҡ ҡына яңы ҡорамал алған. Юғары ресурслы “РБ-МВ 160” тип аталған ҡырҡыу машинаһы 60 сантиметр диаметрҙағы 800 кубометрға тиклем ағас эшкәртеү мөмкинлеген бирә.
Бына шулай, тәү ҡарашҡа сүп-сар һымаҡ ҡына күренгән ботаҡтар, япраҡтар ошо компания ярҙамында төрлө файҙалы продукцияларға әйләнә.
– Беҙ, шулай уҡ, ҡала хакимиәтенең йәштәр советы менән берлектә, “Таҙа урамдар” янғынға ҡаршы социаль проектында ҡатнашабыҙ. Был проект сиктәрендә законһыҙ сүплектәр буйынса рейдтар үткәрәбеҙ, – ти компания директоры.
Ысынлап та, “БашЭко” компанияһы барыбыҙ өсөн дә файҙалы эш башҡара, сүп-сар булып ятҡан ағас ҡалдыҡтарына яңы сифатта икенсе һулыш алырға ярҙам итә. Ҡалабыҙҙы күркәмерәк итеүҙән һеҙ ҙә ситтә тороп ҡалмағыҙ, дуҫтар! “БашЭко” компанияһына шыршығыҙҙы, төҙөлөштән йәки ремонттан һуң ҡалған ағас ботаҡтарын, ботаҡ киҫәктәрен һәм башҡа материал тапшырып ҡына ла ошо оло эшкә үҙ өлөшөгөҙҙө индерә алаһығыҙ. Аҙаҡтан ул ағас ҡалдыҡтары органик ашламалар һәм ҡоротҡостарға ҡаршы көрәшеү өсөн, мейескә яғыр өсөн юнысҡы булараҡ ҡулланыласаҡ.
Белешмә өсөн телефон: 8(3473)267-888.
Гөлкәй ҠЫУАТОВА.
Эльдар ФӘТТӘХОВ фотолары.