Яҙҙың тәүге шатлығы – умырзая

Йыш ҡына был яҙғы мөғжизәне халыҡта ҡар бөртөктәре тип тә атайҙар. Сөнки улар ҡышҡыһын ҡар аҫтында үҫә башлай. Улар матурлыҡтың тәүге хәбәрселәре булғанлыҡтан, кешеләр тәбиғәткә зыян килтереү тураһында уйламайынса, өҙә. Уларҙы юҡ итеүҙән нисек һаҡларға?

Бала саҡтан ук тәбиғәткә һөйөү тойғоһо уятырға кәрәк, сөнки бала саҡ тойғолары һәр саҡ киҫкен һәм сағыу. Балаларыбыҙҙың тәбиғәтте яратыуын һәм уға һаҡсыл ҡарауын теләһәк, беҙгә уға ҡарата мөхәббәт тойғоһо уятырға кәрәк. Беҙҙең балалар баҡсаһында, күп кенә мәғариф учреждениеларындағы кеүек үк, экологик тәрбиә биреүгә айырыуса ҙур иғтибар бирелә.

Йыл һайын Стәрлетамаҡта умырзаяларҙы яҡ-ау экологик акцияһы уҙғарыла. Уның төп бурысы – балаларҙа һәм өлкәндәрҙә тәбиғәткә дөрөҫ һәм аңлы мөнәсәбәт тойғоһо уятыу. Беҙҙең 73-сө балалар баҡсаһы ла был акциянан ситтә ҡалмай. Балалар менән әңгәмә, дәрестәр, викторина кеүек саралар ойошторабыҙ, аппликациялар, ҡул эштәре эшләйбеҙ, листовкалар төшөрәбеҙ һәм уларҙы таратабыҙ, шиғырҙар уҡыйбыҙ һәм өйрәтәбеҙ.

Акция балалар өсөн генә түгел, шулай уҡ ата-әсәләр өсөн дә ҡыҙыҡлы, балалар менән төрлө әйберҙәр эшләйҙәр. Шулай күмәкләп тәбиғәтте хәстәрләргә өйрәнәбеҙ.

А. ШӘРИПОВА,
С. МӘХИЙӘНОВА,
73–сө балалар баксаһы тәрбиәселәре.