75 күп фатирлы йорт ремонтланасаҡ

Быйыл башҡарыласаҡ эштәр ауыл һәм ҡалаларҙы төҙөкләндереп, уларҙың эстетик йөҙөн заманса формалаштырыуға һәм халыҡҡа тағы ла уңайлыраҡ көнкүреш шарттары тыуҙырыуға булышлыҡ итәсәк.
Дөйөм алғанда, йәшәгән мөхитебеҙҙең күркәмлеге һәм уңайлыҡтары күп нәмәгә бәйле. Улар рә­тендә йорттарҙың һәм ихаталарҙың төҙөклөгө айырым әһәмиәткә эйә. Сөнки төҙөк йорттар, зауыҡ менән биҙәлгән ихаталар йәшәгән еребеҙҙең эстетик йөҙөн билдәләй бит.
Ошоға бәйле, быйыл Стәрлетамаҡта күп фатирлы йорттарҙа ремонт эштәре дауам итә. Ҡалала 79 объектты һәм 75 йортто төҙөкләндереү планлаштырылған.

Әйткәндәй, 27 йортта лифт алмаштырыла, 8 йортта һыу менән тәьмин итеү һәм һыу таратыу системаһына капиталь ремонт үткәрелә, 32 йортта йылытыу системаһына, бер йорттоң сарҙаҡ япмаһына ремонт үткәреләсәк һәм 9 йорттоң фасадын йылытыу ҡаралған.

Әлеге ваҡытта биш йорттоң ҡыйығына капиталь ремонт эштәре бара, ә ике йортта эштәр тамамланыу өҫтөндә. Шулай уҡ биш объектта йомшаҡ япмаға капиталь ремонт үткәреү буйынса акт төҙөлгән, уларҙың икәүһендә эш башланған да инде. Алты йорттоң фасадын төҙөкләндереүгә тотонғандар.

Ә бер объектта һыу таратыу системаһына капиталь ремонт үткәрәләр, әммә пандемияға ҡаршы профилактик сараларға бәйле, әлегә эштәр ваҡытлыса туҡтатылған.

Шулай уҡ подъездарҙы комплекслы ремонтлау буйынса подрядсы ойошмалар билдәләнгән. Быйыл ҡалала 31 йорттоң подъезында капиталь ремонт үткәреләсәк. Подрядсылар эпидемия мәлендә эштәрен ваҡытлыса туҡтатып торған.

Ҡалабыҙ көндөн -көн матурлана, йәшәгән йорттарыбыҙ, мәҙәни үҙәктәр заманса төҙөкләндерелә, зауыҡлы объекттар барлыҡҡа килә. Ә беҙ, үҙ сиратыбыҙҙа, һәр нәмәгә һаҡсыл ҡарап, ябай ғына тәртип һәм таҙалыҡ ҡағиҙәләрен үтәп тә Зауыҡлы биләмәләр йылында үҙ өлөшөбөҙҙө индерә алабыҙ.