Фатир ҡарабойҙай түгел...

Баҡтиһәң, әлеге пандемия шарттарында аҡсаны янда тоторға кәрәк урынға кешеләр күпләп фатир ала башлаған.
“Элек уйлар өсөн һатып алыусылар кәмендә бер аҙна ваҡыт һораһа, хәҙер ике-өс көндә әҙер яуаптар менән киләләр”, - ти бер тауыштан төҙөлөш компанияларының һатыу бүлектәре. Шуныһы иғтибарға лайыҡ: һатып алыусылар иҫке фатирҙар янында туҡтап та тормай, тура яңыларына баралар икән.
Әлбиттә, һәр күренешкә үҙ яуабы булырға тейеш һәм бында ла ул ябай ғына: бер аҙ бол туплап өлгөргән кешеләр пандемиянан һуң нимә булырын белмәгәс, аҡса осһоҙланыр тип ҡурҡып, байлыҡтарын ошондай ысул менән һаҡлап ҡалырға булған.