+24 °С
Болотло
Йәмғиәт
24 Декабрь 2020, 13:36
«Башҡорт ырыуҙары гербтары — Рәсәйҙә тиңе булмаған проект»
Бөтә донъя башҡорттарының махсус комиссияһы башҡорт ырыуҙарының геральдик символдарын булдырыу йәһәтендәге эшен дауам итә. Был эшкә Рәсәйҙең геральдистар союзы ағзаһы Кирилл Переходенко ҡушылды.
«Ырыуҙар гербтары—уникаль проект. Рәсәйҙә әле ҡануниәт даирәһендә булған геральдика: дәүләт, идаралыҡтар һәм муниципалитеттар гербтары, һәм традицион юҫыҡта йәшәгән геральдика: ғаилә гербтары һәм шәхси символика бар. Ырыу һәм ҡәбилә гербтарына килгәндә, был беренсе проект. Рәсәйҙә уға тиңдәр юҡ, беҙ эште үҙебеҙ башлап ебәрәбеҙ. Шуға күрә беҙгә хилафлыҡһыҙ эшләргә кәрәк, беҙгә ҡарап, башҡалар эшләйәсәк», — тип белдерҙе Кирилл Переходенко.
Бөгөнгө комиссия ултырышында юрматы ырыуының билдәле вәкилдәренә урыуҙың гербы проекты күрһәтелде, комиссияның эше хаҡында хәбәр ителде. Һәр башҡорт ырыуының гербы өс төп билдәгә таянып эшләнә: тамға, ағас һәм ҡош. Ҡайһы бер ырыуҙарҙың гербтарында, көнбайыштағы девиздарға оҡшатып, махсус таҫмаға ырыуҙың ораны ла төшөрөләсәк. Ғөмүмән, башҡорт ырыуҙарының гербтары—ул көнбайыш һәм рус геральдикаһының ҡаҡшамаҫ ҡанундары һәм боронғо башҡорт аҫаба символдарының ҡатышмаһы буласаҡ.
«Был гербтар айырым әҫәр итеп тә, бер тулайым шәлкем итеп тә ҡулланыласаҡ. Мәҫәлән, башҡорт ырыуҙары конгресстарында, Бөтә донъя башҡорттары ҡоролтайында, башҡа йыйындарҙа. Беҙ төҫтәрҙе һайлауға иғтибар менән ҡарайбыҙ. Мәҫәлән, юрматы ырыуының гербы ҡыҙыл төҫтә эшләнгән. Был ырыуҙың башҡалары араһында мөһимлеген күрһәтер өсөн. Бөгөн беҙ юрматы ырыуының гербы проектын раҫланыҡ. Осрашыуҙа ишетелгән талаптарға таянып, бер-ике художестволы төҙәтмә индерәсәкбеҙ. Йәмәғәтселек ҡалған ҡырҡтан ашыу гербты ижад итеп раҫлауҙа әүҙем ҡатнашыр, тип ышанабыҙ. Халыҡтың тарихы менән ҡыҙыҡһыныуы—милләт сәләмәтлегенең күрһәткесе», — тип белдерҙе Кирилл Переходенко.
https://kurultai.ru
