+20 °С
Болотло
Йәмғиәт
15 Ғинуар 2021, 09:30
Өҙөлдө моң...
Йәнә йән өшөткөс хәбәр ишетеп тетрәндек. Салауат драма театры актеры Риза Мәһәҙиев китеп барған. Был хәбәр барыһын да аяҙ көндө йәшен атҡандай һиҫкәндерҙе. Әле яңы ир уртаһы ҡорона инеп, сәхнә гиҙеп уйнап йөрөр сағында, иллеһен дә тултырмайынса китеп барҙы шул. Риза Рафаил улы актерлыҡ оҫталығының сағыу өлгөһө булды, театр сәнғәтенә фиҙаҡәр хеҙмәт итте. Әйтерһең дә, үҙенең яҙмышын алдан белгән кеүек, ҡыҫҡа ғына ғүмерендә әллә күпме образдар ижад итеп өлгөрҙө, Башҡортостандың атҡаҙан, халыҡ артисы исемдәренә лайыҡ булды яратҡан актерыбыҙ.
Риза Мәһәҙиевты яҡындан белеүселәр, яҡташтары бик итәғәтле, изге күңелле кеше ине тип һөйләйҙәр, социаль селтәрҙәрҙә лә шулай яҙалар.
Сәхнәгә баһадир кәүҙәле, бер үк ваҡытта ябай ҙа, мөһабәт тә ир уҙаманы сығып баҫыу менән күңелгә нисектер еңел булып китә, унан тыныслыҡ, сабырлыҡ бөркөлөп тора ине. Ишембай районы Ибрай ауылы егете тыуған яғының матурлығын үҙенә йыйғандай, ошо илаһилыҡ уның моңонда, холоҡ-фиғелендә сағылыш тапҡандыр. Йөрәк түренән урғылып сыҡҡан бәрхәт кеүек йомшаҡ, моңло тауышы Ҡарауылтау ҡаяларына ҡаҡлығып, йәнә ҡайтауаз булып әйләнеп ҡайта ла, тормош мәшәҡәттәренән арыған, талсыҡҡан тамашасы йәнен дауалай, ял иттерә.
Ғүмер йомғағының туҡтап ҡалырын күңеле һиҙенептерме, әле яңыраҡ ҡына декабрь айында бик матур клип әҙерләгән. Уның иң һуңғы яратып башҡарған йыры Ғәлиә Кәлимуллина һүҙҙәренә яҙылған “Һарысәс” йыры. Бына шундай талант эйәһен юғалттыҡ. Был Салауат драма театры өсөн генә түгел, Башҡортостостан сәнғәте, милләтебеҙ өсөн оло юғалтыу. Ваҡытһыҙ, иртә өҙөлдө моң...
Йәнең йәннәттә булһын, фирҙәүес баҡсаларында ожмах ҡошо булып һайра, Ҡарауылтауың. Рәүҙәк буйҙарың юҡһыныр һине, ҡабатланмаҫ моң эйәһе!
Роза ҠОБАҒОШОВА.
