+24 °С
Болотло
Йәмғиәт
20 Ғинуар 2021, 08:45
Ғәҙәттән тыш хәлдәрҙе булдырмаҫ өсөн…
Ҡала хакимиәтендә ғәҙәттән тыш хәлдәрҙе иҫкәртеү һәм бөтөрөү, янғын хәүефһеҙлеге менән тәьмин итеү буйынса комиссия ултырышы уҙҙы. Сарала хоҡуҡ һаҡлау һәм күҙәтеү органдары, ҡала һәм хужалыҡ хеҙмәте вәкилдәре, ҡала предприятиелары һәм ойошмалары етәкселәре ҡатнашты.
Күҙәтеү эшмәкәрлегенең Стәрлетамаҡ район-ара һәм БР буйынса Рәсәй Ғәҙәттән тыш хәлдәр дәүләт идаралығының профилактик эштәр начальнигы Рәсим Мөхәмәтйәнов көҙгө-ҡышҡы янғын хәүефе арауығында ҡала биләмәһендә янғын хәүефһеҙлеге саралары тураһында һөйләне. Рәсим Рәүеф улы Яңы йыл һәм байрам көндәре ваҡытында үткәрелгән янғын профилактикаһы эштәренә анализ да яһаны.
Күп фатирлы торлаҡ йорттарҙа профилактик саралар үткәреү буйынса иһә ҡала хакимиәте граждандарҙы яҡлау секторының әйҙәүсе белгесе Резеда Ефремова һүҙ тотто, ә сектор мөдире Ольга Комзалова граждандарһы хәүефһеҙлек менән тәьмин итеү буйынса быйылға пландар менән таныштырҙы.
