“АЛТЫН ЙӘШ”ТӘГЕЛӘР ҺЫНАТМАЙ…

Бында ҡалабыҙҙың төрлө ойошмаларында, предприятиеларында эшләп киткәндәр күнелгә ятҡан шөгөлөн дә, фекерҙәштәрен дә таба. Тәүҙә ҡала китапханаларында башланғыс алған был осрашыуҙар күмәк халыҡ менән үткән байрам сараларында ҡатнашыуға тиклем барып етә икән. Беренсенән, бында 65 йәштән алып 80 йәшлектәр һәм унан өлкәнерәктәр ҙә ихлас йөрөй. Икенсенән, ниндәй генә ҡыҙыҡлы саралар уйлап тапмай улар! Шиғриәт көнөндә Көмөш быуат шағирҙарын иҫкә төшөрһөндәрме, романстар, һуғыш йылы йырҙарын йырлашып ултырһындармы, Ольховка шифаханаһында “Масленица” байрамы ойошторһындармы, Көлкө көнө үткәрһендәрме – береһе лә эҙһеҙ үтмәй. Ҡала буйынса эшләп килгән айырым клубтарҙы Наталья Леонтьева, Татьяна Курбатова, Елена Елисеева, Клавдия Лаврентьевалар етәкләй икән.

Әйткәндәй, Клавдия Владимировнаны ҡалала ла, хатта унан ситтә лә белмәгән кеше һирәктер. Сөнки ул йәш сағында бернисә фильмда, шулай уҡ легендар “Вечный зов” һәм “Золотая речка” фильмдарында төрлө ролдәр башҡарған. Был йәһәттән уны ҡалабыҙ ғорурлығы тиергә лә була.

Ветерандарҙың хәрби рухлы булғанына шаһит БСК үҙҙәренә ҡалабыҙҙың төрлө биҫтәләрендә йәшәгән оло йәштәгеләр өсөн клубтар булдырырға маҡсат ҡуйған. Үрҙә һаналғандарҙан тыш, клубтарҙа Лидия Юрченко, Валентина Кухарева, Светлана Мәмбәтова, Сәкинә Байрамғолова һәм башҡалар төрлө йүнәлештәрҙә эш алып бара. Ә ҡалабыҙҙың мәҙәни сараларын биҙәгән “Оптимистар” хорын ҡалала белмәүселәр һирәктер ул. БСК ярҙамы менән 8 Март – Халыҡ-ара ҡатын-ҡыҙҙар көнө уңайынан ойошторолған “70-се, 80-се йылдар ретроһы” концертынан алған тәьҫораттары менән дә уртаҡлашты осрашыуға килгән апайҙар.

Әңгәмәбеҙгә Ҡала ветерандар советы етәксеһе Тәлғәт Ғәбитов та ҡушылды:

– Стәрлетамаҡта ҡала ветерандарының ялын ойоштороу, сәләмәт тормош алып барыу буйынса хәстәрлек юғары кимәлдә ҡуйылған. Улар ҡайҙа ғына булманылар. Башҡортостан, Татарстанды арҡырыға-буйға гиҙеп сыҡҡандан һуң, Рәсәй ҡалалары буйлап сәйәхәт итеүгә күстеләр. Беҙ күргән изге урындар, музейҙар, мәсеттәр һәм сиркәүҙәрҙең иҫәбенә лә сығырлыҡ түгел, – тине ул. Әйткәндәй, беҙҙең ветерандарҙың барған ерҙәрендә төшкән фотолар тупланған махсус альбом да бар хакимиәттә. Тәбиғәт ҡосағында булһындармы, саңғы шыуһындармы йәки скандинавса йөрөһөндәрме, йырлаһындар-бейеһендәрме – барыһы ла кадрҙа сағылыш тапҡан.

Ысынлап та, күҙҙәре янып, энергиялары ташып торған был апайҙарға ҡарап, уларҙың һөйләгәндәрен тыңлап, мин үҙем дә, бөгөндән үк булмаһа ла, уларға ҡушылырға булдым. Уларҙың рухи көсө, теремеклелеге күңелгә дәрт өҫтәп кенә тора.